Bo ta scuch’e na varios ocasion: Aruba tin hopi talento. Siguramente un isla bendiciona cu hopi hende cu ta talentoso den varios disciplina, pa ta un isla chikito ta algo cu nos mester semper ta orguyoso di dje. Den loke ta e disciplina di musica, nos tin un banda yama The Rokkeros cu recientemente a caba di lansa nan prome album.
E ta un grupo cu a cuminsa na San Nicolas, pa ta exacto na Filomena College Mavo. Algun hoben den klas tabata haci joke di bay start un banda, y despues a cuminsa siña instrumentonan y toca na diferente lugar pa practica.
E banda ta consisti di cuater musico, y dos extra. E meta di e banda ta pa traha bon musica y baila, awor cu metanan pa bay internacional y comparti nan musica cu resto di mundo. E album nobo tin un total di nuebe cantica, cu temanan manera Chocolate Spice, As you and me, Kiss and Touch y varios otro tema cu sigur lo bo ta scuchando ta toca rond pronto tur caminda.
E cancionnan ta consisti di un mix di diferente genero, Funk cu Rock, of Funk cu poco Jazz. “Diferente miembro di e banda tabata tin diferente idea y tur a bini hunto den un cos,” segun Jeyo Díaz Quintero, Guitarista y miembro di The Rokkeros.
E hobennan aki a cuminsa for di cero, cu poco nervio den sali pa comparti nan musica cu tur hende na inicio pero tur esaki a disparce manera nan a tuma e paso di bay p’e. Un ehempel bibo tambe di semper kere den bo mes y den bo arte pa bo sigui move bay dilanti. “Nos a stop di pensa riba kico otro hende ta pensa y mas riba kico nos ta gusta di nos producto, y nos a cuminsa ‘have fun’ y disfruta nos musica,” Jeyo ta conta.
The Rokkeros ta gradici Dios pa tur bendicion, tur miembro di banda pa semper pusha, Ruben, Fernando, Daniel Werleman, Serghio Jansen, mi maestronan na scol di musica cu semper a purba yuda y motiva mi. Un danki special ta bay na Michael Solognier y Elijah Wester pa ta parti di e proceso den crea e album.
Por sigui The Rokkeros riba Instagram y Youtube na @TheRokkeros tambe riba Facebook, eynan por haya tur informacion y contacto pa contrata pa toca.
