Anualmente, riba dia 10 di december, riba dia di cumplimento di aña di e iniciado di e idea, ta start e temporada di iluminacion di e grot di Divino Niño Hesus na San Nicolas. E aña aki no tabata un excepcion, aunke cu door di e pandemia mester a limita e eventonan. Asina mes a percura pa bunita iluminacion di henter e grot.
E idea pa ilumina e grot di Divino Niño Hesus den Weg Seroe Preto tabata di Dufi Rasmijn (dfm) y y su yiunan cu a sigui cu e trabou te cu awendia. Selfa Rasmijn-Wernet, a conta cu e shete yiunan di Dufi cu a keda na bida y su nieto Gilbert Wernet, a dicidi di sigui cu e bunita obra aki, un trabou di boluntario cu nan ta haci cu hopi amor pa 20 aña largo.
Ta logra crea un bunita iluminacion na e grot y tur riba nan propio esfuerso. Normalmente ta logra esaki door di bende cuminda. E aña aki no a logra bende, pa motibo di pandemia. Ta riba nan mesun forsa a percura pa e luznan y decoracion.
Ta haci un apelacion riba tur hende pa coopera y no bay cu e bombionan, tampoco cu e decoracionnan. Tur aña nan tin problema cu malhechornan ta horta nan materialnan. Esey ta masha lamentabel.
E storia tras di e grot
Dufi Rasmijn a cuminsa of crea grot di Divino Niño Hesus, basa riba un promesa cu el a haci, despues cu su yiu a haya un accidente y a keda gravemente herida. “Nunca mi tata a kere den aparicion. E tabata bisa cu e ta kere den Dios pero no den aparicion. Pero dia cu mi ruman homber a haya accidente, despues cu nan a bis’e cu no tin mucho pa haci, el a sali for di hospital. Riba e muraya pafo el a mira e imagen di Divino Niño Hesus. El a puntr’e kico el a bin haci, si ta pa hiba su yiu. El a sigui cana y ora cu el a bira pa wak, atrobe e ta mira e imagen riba e muraya di unda tabata PAAZ. Den su saco di carson el a haya un carchi di Divino Niño cu nunca e tabatin. Esey tabata algo hopi straño p’e”. Despues di e sucedido ey el a bisa su yiunan cu si e yiu malo recupera, e lo busca un Divino Niño y hink’e den un grot. Esey ta loke el a haci tambe.
