Departamento di Salud Publico su seccion Dienst Warenkeuring en Hygiëne ta sigui cu nan control rutinario riba supermercado rond Aruba. Esaki pa por garantisa cu comunidad di Aruba ta ricibi producto y alimento di bon calidad.
Durante e controlnan aki seccion Dienst Warenkeuring en Hygiëne ta controla hygiëna di e localidad, fechanan di vencemento di productonan y certificado di salud di empleadonan.
Recientemente e seccion di Departamento di Salud Publico a subi caya un bes mas conhuntamente cu Directie Economische Zaken y KPA pa haci diferente control cu tabata fructifero. Durante e controlnan aki a controla tambe prijs di producto y verguning di establecimento.
Seccion Dienst Warenkeuring en Hygiëne ta ricibiendo diariamente informacion y keho di comunidad riba localidadnan cu ta bende producto of alimento pa consumidor y cu no ta cumpli cu leynan stipula. E seccion ta haci su maximo esfuerso pa atende y investiga tur informacion duna y ta encurasha comunidad pa sigui ta critico na momento di cumpra un producto y si como consumidor bo tin cualkier duda por yama nos seccion libremente of por presenta serca nos cu productonan cu por ta dudoso.
Pa mas informacion por tuma contacto di seccion di Dienst Waren Keuring en Hygiëne di Departamento di Salud Publico na 522-4200.