Durante e conferencia di prensa cu Premier Evelyn Wever-Croes y Secretario di estado pa husticia y siguridad, Fred van der Burg a ofrece diamars mainta na sede di Bestuurkantoor, a papia di kico ta loke Aruba ta spera lo bin awo for di Hulanda den termino di reparacion. Nos prome mandatario a sigura cu e no ta bay mara un suma na dje ainda pasobra tin un trayecto andando cu comision trahando riba e tres nivel di deseo cu Aruba tin pa cu esaki.
E splicacion di parti di prome minister a bin como contesta na pregunta di periodista local Sharina Henriquez. Den dje, Wever-Croes a cuminsa na ratifica cu e declaracion cu el a haci dialuna ta e prome reaccion den nomber di Gobierno di Aruba caminda ta ricibi e disculpa di gobierno Hulandes pa tuma e prome stap.
![](https://24ora.com/wp-content/uploads/2022/12/IMG_7369-2-1920x1280.jpg)
![](https://24ora.com/wp-content/uploads/2022/12/IMG_7376-1-1920x1280.jpg)
Pa loke ta trata reparacion financiero, ta un punto cu segun e mandatario, no a yega na dje ainda. “Na Aruba nos kier tin algo di bisa den loke ta bay pasa y nos tin tres nivel pensa,” Wever-Croes a bisa splicando cu e prome ta simbolico cual e comision lo determina. Ya caba secretario di estado a bisa cu Hulanda ta prepara pa traha riba un sorto di monumento pa Virginia, conoci aki na Aruba como un di e catibonan. No necesariamente esey mester ta e nivel simbolico, prome minister a admiti, pero ta un opcion.
En todo caso, Aruba ta sigui riba e trayecto estableci door di minister di cultura y cu ta bay te cu 1 di juli 2023. E ora ey lo por bisa di un forma mas concreto kico ta e contesta riba e preguntanan aki y si por papia di lucha contra pobresa, etc. Mientras cu tin algun ehempel rond mundo di con ta atendiendo cu reparacion, no necesariamente esakinan ta pas cu Aruba.
Pa e relato completo, lesa edicion di TREMPAN