Diahuebs ultimo a tuma luga un evento hopi special na Bogota, Colombia. Embahada di Reino Hulandes a organisa un evento pa comerciantenan Colombiano y Hulandes crea relacionnan estrecho di comercio entre e continentenan. Ernst Noorman ta e embahador residencia na Bogota. E evento a tuma luga den hardin di e residencia na Colombia.
Durante e evento aki tabatin diferente ‘stands’ di compania nan Hulandes y Colombiano kende a expone nan mes p’asina mustra e interes den haci negoshi cu otro. E evento, “Experience The Netherlands” tabata uno fructifero, esaki no tabata su prome edicion. Embahada hunto cu Holland House, kende ta e Camara di Comercio di Hulanda tabata encarga cu e parti organisatorio di e evento.
Aruba como parti di Reino Hulandes tambe tabata presente durante e evento aki. Hasta a nota presencia di Minister Xiomara Maduro kende a invita e comerciantenan Colombiano pa inverti na Aruba. Compania di arkitecto, tour, VIP service y mas di Aruba a probecha di un momento sumamente importante pa crea mas netwerk ainda cu tin hopi beneficio pa nan negoshi.
E evento a conta cu presencia di compania nan manera Philips, KLM, compania di flor, compania cu ta atende cu awa, energia duradero y mas. Noorman a enfatisa cu Aruba tin un rol importante y cu pa algun aña caba tin bon relacion cu Colombia.