Awe mainta den careda di 11:50 am a tuma luga un accidente na altura di rotonde Ponton caminda cu un truck di DOMESA a alcansa un ciclista. E trucknan aki ta blinda, pues ta truck pisa y por tin sigur cu e impacto lo tabata uno fuerte.
E ser masculino riba e bicicleta a cay y a ricibi basta golpi. Ambulance y demas trahado di emergencia a yega na sitio dibiaha pa evalua e situacion. Sinembargo, lamentablemente no por a haci nada pa e persona y el a fayece na sitio.
Mientrastanto a cera e area pues pa esunnan cu ta transita e area aki tene esaki na cuenta. Vocero di polis Liliana Rasmijn a confirma na 24ora.com cu pa 12:25 dokter Texier a constata morto di Franklin Edwin Dirks naci dia 25 di juli 1958, pues el a fayece na e edad di 63 aña.
Di parti di Headlines Group nos ta manda nos mas sincero condolencia na e famia di e fallecido.