Mientras cu varios parlamentario a bin abao pa asina combersa cu e werksternan cu a presenta dilanti edificio di parlamento, pa asina demostra nan preocupacion riba nan situacion laboral, presidente di parlamento nobo Edgard Vrolijk a dicidi di schors e reunion y cera e sprekerslijst, pa asina no papia riba e situacion di werksternan y tambe henter e presupuesto 2021, poniendo un nubia scur sigur riba democracia di Aruba, segun parlamentario di fraccion di AVP Mike Eman.
Loke a sosode tambe ta cu a habri e reunion bek riba peticion di Geoffrey Wever di RAIZ y Marisol Lopez-Tromp di MAS, si no lo perde quorum, segun declaracion di parlamentario Miguel Mansur di Accion 21.
Mike Eman a comenta di su banda cu ta trata di un presupuesto di cantidad di medida hopi pisa pa henter nos pueblo y un cantidad di medida mas pa bin. Ta sumamente tristo cu democracia di Aruba ta yega na e punto aki, caminda cu tin un partido RAIZ sinta na e otro banda cu a bisa cu nan ta parti di e cambio. Cu nan ta bay renoba politica riba un otro nivel, caminda cu tin miho participacion di parlamento.
Awe a demostra di ta coopera cu e presidente di parlamento pa simplemente cera e reunion prome cu cualkier persona por a hiba palabra.
Varios miembro di fraccion di AVP tabata busca e sprekerslijst, cual tabata scondi pa nan pa nan no por a firma segun Eman. Esey ta un wega cu por a nota na momento cu a scoge e presidente di parlamento.
Y combersando cu e werksternan preocupa, a probecha di e ocasion pa cera e reunion den parlamento, no dunando ningun di e miembronan di fraccion AVP, Accion 21 y MAS e oportunidad pa por forma parti di e debate politico.
Mientras tanto a habri e lista di orador bek, unda cu a firma entre otro, di parti di oposicion, Aquanette Gunn di MAS, Gerlien Croes y Mervin Wyatt-Ras di AVP y Miguel Mansur di Accion 21.
Parlamentarionan Mike Eman, Mike de Meza, Ryçond Santos do Nascimento, Arthur Dowers y (pa rasonnan obvio) Benny Sevinger no tabat’ey presente. E ultimonan aki no tabata sa cu a habri e lista di orador bek.
Pa mayor cobertura lesa TREMPAN mañan.