“Nos a yega na un acuerdo pa sigui negocia pa yega na un coalicion”, asina lider di MEP, mr. Evelyn Wever-Croes a anuncia diahuebs anochi durante un conferencia di prensa extraordinario teni na Restaurant Faro Blanco na Malmok. E ta referi na un acuerdo cu e partido politico MEP, cu a logra 9 asiento den e ultimo eleccion, a yega cu partido RAIZ, kendenan a logra 2 asiento. Hunto e dos partidonan tin un mayoria limita, pero suficiente, pa por goberna Aruba den e siguiente cuater añanan.
“Awe nos a reuni cu e Informadonan y nan dilanti nos a firma un declaracion di intencion pa negocia y yega na un coalicion. Nos tin ya caba desde dialuna ta cuminsa papia cu Informadonan. Despues nos a haya un briefing di e Informadornan riba kico nan mes a haya como feedback di diferente lidernan politico cu nan a reuni cu ne. Y nos a reuni y nos a yega na e conclusion cu entre nos partidonan tin suficiente similaridad pa nos traha riba un base pa nos por goberna Aruba den e temponan nos dilanti. Nos sa cu e pais ta den pandemia ainda, pero nos sa tambe kico mester wordo haci. Y den esey partido MEP y partido RAIZ a haya otro den liñanan grandi”, asina Evelyn Wever-Croes a anuncia durante e conferencia di prensa.
El a menciona su tras cu, probechando e presencia di tur e candidatonan y di prensa, cu a dicidi di firma un di dos acuerdo entre MEP y RAIZ den cual ta acorda riba e liñanan grandi riba cual lo sigui delibera pa yega na un acuerdo di gobernacion awo.
Ursell Arends, lider di partido RAIZ a anuncia cu “Desde un inicio nos a bisa: Loke RAIZ kier wak ta continuidad, stabilidad, integridad y paz. Awe nochi pa mi ta un honor pa ta para aki na e faro pa firma un declaracion di intencion, pa asina nos continua y yega na un coalicion pa Aruba. Un gobierno cu por traha na bienestar di henter e pueblo di Aruba. E faro nos tras ta representa perseverancia y dia den y dia afo e faro ta wordo asota dor di biento y solo pero toch e ta para pa mas di un siglo eynan. Y mescos cu e faro, e pueblo di Aruba ta pasa den duro, pero nos ta para aki pa sigui hiba e pais padilanti.”
E puntonan cu e dos partidonan a acorda cu otro pa por forma un programa di gobernacion ta:
- Integridad
- Acuerdo cu Hulanda
- Recuperacion economico
- Finansa publico balansa
- Desaroyo sostenibel den medio ambiente
- Derechonan social
- Cuido di adultonan mayo, muchanan y hobennan
Pa loke ta preguntanan riba con largo lo dura pa formacion, ningun di e partidonan no por a contesta. Ambos a opta tambe pa no papia di cantidad di ministernan, pasobra denBon pasado a yega di para pa shete pero ora di negociacion mester a acepta ocho toch. Tur cos ta depende di e negosacionnan cu ta cuminsa awo mesora, incluyendo weekend.