Diadomingo atardi e cabesante suplente di Sint Dominicus College, esta Mario Lobo, a manda informa tur mayor cu a cera e scol pa un siman largo! Motibo di e decision drastico aki ta pa cumpi cu reglanan mara den e protocol cu Departamento di Salud Publico di Aruba (DVG), conoci como e “DVG-Protocol quarantaine in opvang- en onderwijsinstellingen”. Den dicho protocol ta papia di cera scol completo den caso di contagio.
Cabesante suplente di e scol a splica mayornan cu a tuma contacto cu e hefe di Jeugd Gezondheidzorg (JGZ) na Departamento di Salud Publico, kende a conseha pa, teniendo cuenta cu e cabesante a test positivo, pa manda henter e scol den cuarentena preventivo obligatorio. E medida aki ta drenta na vigor desde dialuna dia 15 di maart y ta sigui te cu dialuna 22 di maart proximo.
![](https://24ora.com/wp-content/uploads/2021/03/6B3A5870-1920x1280.jpg)
DVG a informa e ekipo di maneho di Sint Dominicus College, cu den e caso aki, tur alumno, maestro y e ekipo di maneho mester bay cas den cuarentena obligatorio. Durante e siman cu no tin scol, lo percura pa desinfecta tur klas y e facilidad completo di e scol, pa evita mas contagio ora e scol habri atrobe otro siman.
![](https://24ora.com/wp-content/uploads/2021/03/6B3A5868-1920x1280.jpg)
- Cuarentena preventivo ta encera cu e alumno mester bay den cuarentena como medida di prevencion. E por ta contagia of no.
- Durante e tempo indica e mester keda cas y no por atende ni scol, ni tra’i merdia, ni deporte, fiesta y ni bishita ningun otro hende.
- Mester evita cu tin contacto cu otro personanan.
- Mayornan mester observa si e yiu(nan) ta desaroya sintoma di Covid-19 den e dianan aki. Si esey sosode, mester yama dokter di cas mesora.
![](https://24ora.com/wp-content/uploads/2021/03/6B3A5871-960x1440.jpg)
Si nada cambia, Sint Dominicus College lo habri atrobe diamars dia 23 di maart 2021. Scol ta spera cu tur alumno y maestro lo keda cas preventivamente y cu ningun ta contagia ni bira malo den e periodo.
Aña pasa Sint Dominicus College a celebra 105 aña di exitencia, pues ta un di e scolnan di mas bieu di Oranjestad. E tempo aya e tabata un scol solamente pa mucha homber y frerenan tabata duna les. Cu tempo el a bira un scol pa mucha homber y mucha muhe. E scol tin 270 alumno, cu como 30 alumno den cada klas.