E ekipo 13/14 di 297 Boyz ta preparando pa bay Cartagena, Colombia pa representa Aruba. Manager di e ekipo, Glenda Thomasia, a splica cu pa mas di dos luna, ta ricibiendo ayudo di Conrad y Edson den Boef, cu nan fine tuning di bateo, echo cu e ekipo ta super contento cu ne.
Actualmente e ekipo ta promoviendo un rifa p’asina recauda fondo. Nan tin un luna caba ta bendiendo y lo sali diasabra, cual a bay hopi bon. Thomasia a expresa di ta hopi gradicido n’e pueblo di Aruba, cu a contribui cu e muchanan.
Sin ayudo di un y tur, hopi biaha e muchanan por haci algo. P’esey mes e ta gradicido cu semper e ekipo ta saca cara. Tur hende ta topa e muchanan y ta cumpra rifa fo’i nan.
PREMIO
E rifa tin balor di 10 florin cu hopi premio. Entre otro caha di loinribs, caha di galiña, hamburger, 50 lumpia, bara di lomito, bara di porkloin, bara di striploin, dos paki di chickenbreast, saco di chips, cheeseballs, caha di softdrink, boter di Old Par, caha di Heineken y tambe di Balashi. Ta un rifa cu por cuminsa prepara pa Pasco caba, pone tur cos cla. Semper cu haci riba, e ekipo kier a haci algo cu ta nifica probecho p’e pais.
Pa cumpra rifa por yama 5936620. Ainda a resta buki pero si kier yuda contribui cu cualkier suma, por yama e number. E ora Thomasia mes por bin y entrega e rifa. Tin 13 mucha homber cu ta bayendo pa representa Aruba na Cartagena, cu ta hopi bon entrena.
Na BMC e muchanan ta train nan bateo tur diaranson y diabierna y den siman nan ta train cu Thomasia riba veld. Tambe e ta gradicido n’e teamnan cu ta yuda cu fogeo, esta Starz y Hurricanes cu tambe ta yuda cu fogeo.
INVITACION
E rifa ta diasabra anochi. Ainda tin chens pa yama y yuda. Cada 10 florin ta yuda, segun Thomasia. Asina ta, tuma contacto cu Glenda Thomasia, kende lo percura pa bo haya bo rifa.
Tambe diasabra lo saca potret n’e diferente partinan di Aruba, pa nan traha poster, pasobra e idea tambe ta pa promove nos isla turisticamente na Cartagena, Colombia.
