“Yega hisa benta…sopi pura ta sali salo!”, tabata un comentario di un usuario online relaciona cu descontinuacion den servicio prepaid di coriente brinda pa ELMAR na pompstacionnan. Ta asina cu diabierna 2 februari ELMAR a haya informacion for di clientenan cu ta prefera un transaccion personal, cu tin pomp stacionnan a stop e servicio pa recarga nan cuenta di SmartUp Prepaid. Ta trata aki di Aruba Gas Dealers Association (AGDA) cu a tuma e decision pa suspende e servicio aki sin notificacion previo na ELMAR of su clientenan, segun ELMAR ta informa.
“Prome boso a tuma e decision aki, mester a sinta cu tur gas stacion etc, pa hinca un que otro. Bo ta imagina bo tin baby, no tin pay.aw, y coriente caba,” un otro usuario ta reclama. ELMAR a anuncia nan ampliacion di orario di servicio na sucursal pa cliente di SmartUp debi na e decision aki di Aruba Gas Dealers Association pa suspende e servicio di pago.
ELMAR NO T’E PROBLEMA
Dus hopi hende ta rabia cu ELMAR pero e compania a laga sa caba cu e decision aki a bini sin notificacion previo na nan of nan clientenan. Nan ta afirma cu nan clientenan di SmartUp Prepaid por keda trankil cu si ricibi notificacion durante anochi cu e cantidad di kWh ta Cabando, e meter Prepaid lo continua na suministra coriente te cu 8’or di mainta, dunando asina e oportunidad pa pasa recarga su siguiente mainta na sucursal di ELMAR. Esaki ta conta solamente pa clientenan Prepaid cu smart meter. Kier urgi clientenan Prepaid cu meter STS(manual of keypad) pa recarga durante orarionan nobo di servicio.
BUSCANDO SOLUCION
Actualmente ELMAR ta trahando activamente pa busca un solucion pa nan clientenan di SmartUp Prepaid. Pa facilita nan clientenan di SmartUp Prepaid service nan sucursal di Oranjestad lo ta habri awe diasabra 3 februari, 8am te cu 4pm, y diadomingo 4 februari 8am te cu 4pm.
ELMAR a laga sa cu entrante dialuna 5 di februari 2024, tanto nan sucursal di Oranjestad como esun di San Nicolas lo ta habri durante siman for di 7:45am te cu 8:00pm. Alabes nan Contact Center tambe lo habri e mesun orarionan cu nan sucursal di Oranjestad.
Mientrastanto, ta informa clientenan di SmartUp Prepaid y EV ChargeUp pa explora e opcion di pago digital disponibel via Pay.aw.
