Cu esfuerso grandi pero sumamente satisfecho y agradecido na tur esnan cu a brinda nan sosten, Xean-Gelinah Leon ta invita Aruba completo pa mira su video clip cu su cancion nobo: Mi amiga Luna.
Feliz di por a comparti’e riba e fecha di su cumpleaños cual tabata 23 di october. Cu apenas 9 aña di edad, e artista local aki ta sigui su soño y ta presenta su videoclip traha cu hopi amor.
Por a tuma nota di tur esnan cu a forma parti di e produccion aki a pone un sonrisa masha grandi na nan cara pa asina sigura cu e video lo a keda super bunita.
Xean-Gelinah tin musica den su sanger y manera hopi artista local, ta traha cu cariño, ta pone su estudio prome y ta scucha conseho di un y tur cu ta duna un man pa yud’e den su carera.
Un sunchi grandi y un danki di curason e ta manda na esnan cu mas ta kere den talento y sacrificio di artistanan local, cual ta e compositor di e cancion aki, cu ta un persona di un curason inmenso y bunita , Zulaika Geerman. Como tambe e persona cu ta dedica su tempo y profesionalismo pa duna e toke di magia final, e areglista cu detaye special den musica: Ivan Quandus.
Pa pone tur esaki hunto y laga e publico gosa di e produccion aki, a pone e filmacion den man di Carlos Dijkhoff, danki pa haci tur cos un bunita realidad.
Na cada un di boso cu lo share/scucha/canta/apoya Xean-Gelinah y su cancion, Mi amiga Luna, DANKI. Danki pa sostene musica, pa sostene nos muchanan y pa duna balor na trabou haci cu hopi amor y dedicacion. Ban stimula nos talento hoben, nos muchanan pa asina mas proyecto bin dilanti caminda musica lo keda resona pa semper y semper.
