Ariba “World Polio Day” Rotary Club Aruba tambe a forma parti di e causa di Rotary International. “World Polio Day” tin como meta pa aumenta conocemento, fondo y sosten pa pone un fin na e malesa di polio na mundo, cu por wordo trata door di un vacuna.
Casi 30 aña pasa Rotary International hunto cu otro partners a lansa e iniciativa “Global Polio Eradiction”. Na aña 2007 Bill & Melinda Gates Foundation a join Rotary den e compromiso pa eradica polio na mundo. Desde inicio di e iniciativa aki e caso nan di polio a baha cu 99.9 porciento. Te cu awe Rotary International a contribui cu mas di $1.9 biyon i ora nan di boluntario nan pa asina proteha mas di 2.5 biyon di mucha den 122 paisnan.
Aunke cu na Aruba nos no conoce caso mas di polio, door di e vacuna cu tur baby ta ricibi via Stichting Wit Gele Kruis, Rotary Club Aruba, formando parti di un organisacion internacional, kier a concientisa pueblo di Aruba tocante e malesa di polio. Ademas Rotary Club Aruba a compromete su mes na duna fundo anualmente na e causa aki di Rotary International.
Awe, polio ta existi na Afghanstan, Nigeria i Pakistan. Pero ta crucial pa sigui cu e causa aki den tur otro paisnan. Si stop cu e iniciativanan aki, dentro di 10 aña polio lo por paralisa mas di 200.000 mucha pa aña.
