E aña aki, pa Dia Internacional di Hende Muhe 2023, Futura y Women’s Club of Aruba (WCA) a organisa un seminario den contexto di e tema di e aña aki cu ta ‘Innovacion y Tecnologia pa Igualdad di Genero.’ E seminario a tuma luga dia prome di maart, na Workplace The Hive, situa na Tanki Flip.
E oradornan a scoge nan topico cu e meta di duna informacion valioso, pa e hende muhe por avansa cu confiansa den e campo di tecnologia, innovacion y pa stimula e siguiente generacionnan, en especial nos mucha muhenan, pa nan desaroya nan mes den e ramo di tecnologia.
Moderador pa e anochi aki tabata Emily Perret Gentil, kende a supervisa e evento y a introduci e oradornan na e publico presente, mientras cu Norma Brinkenberg, como presidente di WCA, a duna bonbini na tur e participantenan di e anochi aki, enfatisando cu un di e metanan di WCA ta pa enfoca riba e interesnan di e hende muhe en general, cu bista riba un desaroyo positivo di nan capacidadnan.
E prome orador tabata Thessaly Zimmerman di Innovation Lab Futura, kende tin un grado di Bachelor den Comunicacion y ta ‘project manager.’ El a presenta ‘Supernova’, e proyecto di plataforma femenino di e compania.
A sigui cu Solange Marlin di Digital Natives, kende tabata e di dos orador y ta ‘project manager’ den campo di implementacion di software di negoshi y maneho di informacion. El a papia di su experencia personal den un campo di trabou cu mayormente ta domina pa hende homber. El a papia tambe tocante di e programa‘Code Club Aruba’, un iniciativa cu e meta pa educa hubentud, specialmente nos mucha muhenan, den e area di pensamento di diseño di tecnologia di informacion.
E di tres orador tabata dr. Kathleen Reddick. Su topico tabata ‘Inteligencia Emocional, Liderazgo y Motivacion’. Dr. Reddick, ta un Profesor Asocia, Emeritus, y anteriormente tabata director di e programa pa Graduadonan di Management na St. Elizabeth University. E ta un experto den comunicacion strategico y liderazgo . Su doctorado ta enfoca riba teoria di Aprendisahe di Adulto, Entrenamento y Desaroyo di Recursonan Humano. Dr. Reddick a presenta tocante e importancia di liderazgo y con inteligencia emocional ta un parti importante di un lider influyente. E ta un orador dinamico y a sigura e interes di e audiencia.
E di cuater y ultimo orador tabata dr. Kathy Marino, kende a trece dilanti Siguridad y Proteccion Cibernetico. Dr. Marino a obtene su doctorado den Maneho, Liderazgo y Politica di Educacion Superior for di Seton Hall University. E tin un grado di maestria den Administracion di Negoshi y Tecnologia Instruccional for di Georgian Court University. Durante su 20 añanan como director di Tecnologia di Informacion tempo completo, el a duna les na universidad tocante Crimen Cibernetico, Digital Forensics, Cultura di Hacking y Metodonan di Investigacion. Durante su presentacion el a enfatisa e importancia di nabega riba internet di un manera sigur, splicando con hackernan ta traha, ransomware, e importancia di tin un programa antivirus y pa semper actualisa e sistema di internet.
Ta di remarca, cu tanto dr. Marino como dr. Reddick ta miembro di WCA. Tur esunnan cu a participa, a keda hopi contento cu e calidad di e diferente presentacionnan y e informacion valioso cu nan a ricibi riba e anochi aki.
