Diasabra dia 2 di Juli, Women empOwering Women (WOW), a organisa nan di dos evento di Career Day, Career Day 2.0 na Piso 3 Workcenter.
Empowerment Committee a cuminsa cu e proyecto aki y ehecuta bou liderazgo di “Outgoing” Head of Empowerment, Sjeidy Feliciano.
Career Day tin como meta pa guia y prepara e damanan cu ta drenta den e area laboral
E mainta aki a cuminsa cu un ‘Welcome message’ for di presidente Rocío Burgos y nan partner di ORUA Toastmasters club.
Presidente Rocío a pone enfasis riba kico WOW su meta ta, dicon e proyecto aki ta importante p’e organisacion y en corto a duna un splicacion kico un ‘elevator pitch’ ta. ORUA Toasmasters Club a duna un introduccion riba kico nan ta haci como club y tambe a brinda tip y training di entrevista.
Sigui pa un seccion na unda e miembronan a sinta ‘one-on-one’ cu e participante pa hinca nan CV den otro na un manera profesional.
Despues a dirigi e participantenan p’e ‘Beauty Space’ na unda nan por a scoge y bay cas cu paña pa trabou cu e miembronan di WOW a colecta. E miembronan di e ‘Beauty Committee’ a yuda asisti den haci nan cabey y ‘style’ nan look. Oszienne Croes – @MakeUpByOszienne – a haci nan make-up pa completa nan look y p’asina nan por a tuma nan headshots p’e fotografo profesional Ayrton Tromp pa pone riba nan CV.
Como sorpresa y pa finalisa e mainta aki e participantenan a haya e oportunidad pa sinta cu dos agencia di empleo pa aplica ‘per direct’.
Proyecto manera Career Day tin e obhetivo pa brinda un otro hende muhe e oportunidad di supera su mes. WOW ta hopi contento y orguyoso di e hende muhenan cu a ‘show up’ riba nan mes y mustra cu nan kier sigui desaroya nan carera profesional y mehora nan situacion actual. Na final di e dia e hende muhenan a expresa nan gratitud y cu nan lo desea pa mas hende muhe den nos comunidad apoya otro n’e manera aki.
WOW kier a gradici su team di boluntario y specialmente Sjeidy Feliciano pa a guia y ehecuta e proyecto aki.
Na nan partnernan di Toastmasters Club of Aruba pa dedica nan tempo boluntario pa “shed y share their knowledge & tips”. Tambe un danki grandi na nan sponsor Romar Trading, Subway Aruba y Piso 3 Workcenter cu a yuda haci e mainta aki posibel. Y sin falta un danki n’e miembronan cu a yuda haci e evento aki uno exitoso!
