A combersa cu Gino Goeloe, director di Wit Gele Kruis kende ta contento di un biaha mas di por ricibi e bishita di Linda Terpstra di e fundacion Hulandes “FIER”. Goeloe a mustra cu e conoce Terpstra pa 8 aña caba y tanto e fundacion na Hulanda y Aruba ta trahando hunto cu otro riba aspectonan di ‘tienermoeder’ cu ta mamanan hoben.
E director di Wit Gele Kruis ta mustra cu a establece e contacto cu Terpstra y e fundacion FIER ocho aña pasa durante e periodo di e ex-director di Casa Cuna Progreso Sra. Arends-Maduro y asina e contacto a keda estableci. FIER ta un ta un fundacion nacional na Hulanda cu ta dedica na entre otro “tiener moeder” of hende muhe den dificultad, ademas di esaki ta duna ayudo riba diferente nivel.
Goeloe ta mustra cu aspectonan di ‘tienermoeder’ a mehora for di tempo cu a cuminsa na aña 2000, e cifra durante e aña aki tawata na 179 ‘tienermoeder’, e director ta mustra cu awo den aña 2024 tin 40 ‘tienermoeder’.
Linda Terpstra ta consehero strategico y pa hopi aña Terpstra a traha cu e fundacion FIER na Hulanda, y semper tawata dedica pa muchanan y hobennan por ricibi guia pa por bay riba un bon caminda.
Terpstra ta di opinion cu ‘tiener moeder’ ta un topico hopi importante, debi cu e mamanan jong mester di un sosten. Un di e puntonan cu su persona semper a boga p’e, ta pa evita cu e muchanan ta cay den un orfanatorio (weeshuis). Si tin mas miembro di famia cu ta dispuesto pa duna yudansa den esaki ta bon bini, pero semper ta enfatisa riba siguridad pa e baby y muchanan pa por percura cu tin un dak sigur pa nan.
Elton Semeleer ta presidente di Casa Cuna Progreso a mustra riba e trabaonan di Linda Terpstra, y ademas varios bishita cu e delegacion Hulandes di Stichitng FIER a realisa na e instituto Rubiano den pasado.
Semeleer ta mustra cu e relacion entre Casa Cuna Progreso cu Stichting FIER ta data for di aña 2016 ora cu a cuminsa atende cu e grupo di ‘tienermoeder’, cu ta trata di mamanan hoben cu ta sperando riba un yiu / of ta cuidando un yiu recien naci.
Na aña 2016 Casa Cuna Progreso a expande su operacion cu cuater camber adicional pa por atende cuater mama, cada un cu dos yiu maximo. E presidente ta mustra cu den transcurso di añanan e grupo di ‘tienermoeder’ a keda crece y tawata adapta na e necesidadnan di e cambionan. Aki a desaroya hunto cu Stichting FIER un ‘dag programa’, pues un programa diseña cu e mamanan hoben no ta keda 24 ora den e centro, pero ta bin pasa dia y ta haya guia y cuido. Aki a ricibi bon sosten for di e organisacion Hulandes pa diseña e programa aki y duna training na e funcionarionan di Casa Cuna, segun Semeleer a mustra.
