WEB Aruba N.V. tin un plan caba pa momento cu drenta e famoso temporada di calor aki na Aruba. Ta papia aki di e temporada di september y october, ora cu e solo ta mas fuerte cu nunca. “WEB ta premira aumento den consumo y lo aumenta e produccion di coriente,” ta loke cu e director Alfredo Koolman a duna di conoce.
For di mei aña pasa caba a cuminsa constata un aumento enorme den e demanda pa energia. E cambio aki tabata algo inusual cu den algun decada no a pasa aden. “E tabata mas halto cu e aumento cu nos a conoce den añanan 1990 causa pa e boom economico. Nos a pensa cu e tabata un trend breaker. Sinembargo e aumento ey no a bay y a keda te awo.” Ta papia di aumento di 10 pa 12%.
A haci analisis cu ta conclui cu e crecemento den demanda pa coriente lo sigui. Ta pronostica cu pa temporada di september y october lo bay tin piek den e demanda di rond di 175 MW. “Esaki ta nifica cu mester cuminsa traha plan pa nos tin suficiente capacidad cu nos por cumpli cu demanda di comunidad.”
A base di e demanda cu lo por tin, a traha plannan pa corto, mediano y largo plaso. Pa e plan di a corto plaso, WEB a pensa riba compra di “temporary power”. “nos ta den e fase di evaluacion. Nos ta calcula cu pa luna di juli ta cla pa firma contracto cu un compania proveedor di “temporary power” pa un periodo di dos aña.”
Durante dos aña e proveedor di “temporary power’ mester entrega na WEB 20 MW di forma cu por cumpli cu e demanda den e lunanan di mas calor, pasobra ta temporada cu no tin biento.
