A traves di un publicacion riba media social Water- en Energiebedrijf Aruba N.V. (WEB) a anuncia awe cu construccion di e planta RECIP IV ta kedando cla. Hunto cu esey, ta informa cu e siman aki WEB ta drenta un periodo di test di diferente parti di e sistema pa confirma cu e planta nobo ta funciona debidamente.
E testnan ta planea pa tuma luga entre 10 pa 31 di mei 2022. E grupo di proyecto RECIP IV, hunto cu empleadonan di diferente departamento na WEB den cooperacion cu partner Wärtsilä, ta determina pa e testnan tuma luga na un manera mas safe y responsabel posibel. Aunke no ta spera, mirando e magnitud y riesgonan envolvi cu e trabou, ta keda existi un posibilidad minimo cu por surgi interupcion di coriente. Lo tuma tur precaucion y coordina e trabou di tal forma pa evita cualkier incidente of interupcion di coriente.
WEB ta spera di por conta cu comprension di comunidad y di antemano ta ofrece disculpa pa posibel inconveniencia. Ta recomenda pa sigui WEB su boletinnan durante e periodo di prueba.
Cu planta RECIP IV den funcionamento, WEB por desmantela e unidadnan antiguo di bapor den futuro cercano, reduciendo asina e consumo di HFO (20-25%), reduci tambe e emision di CO2 y percura pa un suministro mas confiabel.
