Riba dialuna, 24 di juni, Vice-Admiraal Tas, Comandante di Forsanan Naval (C-ZSK), y Comandante Hansen, Director di Wardacosta Region Caribe, a firma e convenio renoba entre Ministerio di Defensa y Wardacosta den Region Caribe. Ministerio di Defensa den esaki ta keda representa pa C-ZSK. E convenio aki, cu cada tres aña ta keda actualisa, ta regla acuerdo di apoyo y cooperacion mutuo entre ambos organisacion.
E convenio ta prepara pa legalmente registra y facilita e cooperacion entre Ministerio di Defensa y Wardacosta. E ta describi prestacion di e servicionan di apoyo den region Caribe pa diverso dependencia di e Comando di Forsanan Naval y otro componente di Defensa. Tambe e ta describi e proceduranan con pa aborda y resolve e problemanan di apoyo mutuo.
Aunke Wardacosta ta un Organisacion independiente, e ta keda intensivamente sostene pa Defensa y mira como un parti integral di CZSK. Cu frecuencia personal di Defensa ta keda facilita pa e funcionnan specifico, y e barco di patruyahe di Defensa, incluso e helicopter di abordo, ta keda desplega di forma planifica pa e operacionnan di Wardacosta. Di otro banda Defensa por haci uzo di e Unidadnan di Wardacosta, tal manera e avion di Wardacosta. E cooperacion aki a resulta specialmente eficaz den e lucha contra e transportenan di droga riba lama.
E sosten na Wardacosta ta keda suministra specialmente pa Comandante di Forsanan Naval den Region Caribe (C-ZMCARIB). Sede principal di Wardacosta ta estableci na Base di Marina Parera na Corsou, djis banda di e sede principal di C-ZMCARIB. E funcion di C-ZMCARIB ta keda cumpli pa Comandante Hansen, cu tambe ta ocupa e funcion di Director di Wardacosta.
E convenio renoba aki ta reforsa e estrecho cooperacion y cooperacion operativo enter Defensa y Wardacosta, pa medio di cua siguridad y eficacia di operacion den Region Caribe por ta mehora ainda mas.
