Ta parce cu Minister di Husticia y Social, Rocco Tjon no tin e situacion na Warda di Balashi bou control. Apart di e decadencia den maneho di husticia, ta mustra claramente cu un biaha mas trafico na Aruba ta birando insigur pa motibo di mal maneho. Pa algun tempo caba polis na Aruba no por haci nan trabou manera mester ta.
Sea, pa falta di material y awo cu no por confisca auto mirando cu Warda di Balashi ta yen. A nota y hasta confirma cu varios polis di diferente districto cu, na momento nan para un auto p’un control rutinario, nan no por haci nan trabou completo mirando cu e warda di Balashi ta yen. No obstante si e auto no tin seguro of si su papelnan no ta na ordo, ta simplemente parti boet y e chauffeur por sigui su caminda. Esaki ta haci claramente cu pocopoco trafico ta birando insigur, cu arsenal di auto sin papel na ordo coriendo rond.
Na aña 2019 a deshaci di tur e autonan cu tabata para parti paden na Warda di Balashi. E tempo ey a deshaci di como 400 auto y 100 brommer. E accion aki a fungi hasta como un motivacion, p’e polisnan por cuminsa haci nan trabou cu smaak atrobe. Na 2019 a benta hasta auto di gobierno mes afo. A machica e autonan y lastranan hibanan pa un compania cu ta bende metal. Hopi di e autonan, nan doño no lo por a tum’e bek pasobra nan mester trece documento y paga pa cada dia cu e auto keda para eyden. E ta bira un suma mas halto cu balor di e auto mes. P’esey tin auto cu tin hasta 8 aña para den cura.
Na 2021 e presidente di comision di husticia den parlamento, Alvin Molina (MEP) a sali fuerte y vocifera su preocupacion riba e situacion aki. Como reaccion, Minister Rocco Tjon a comenta cu lo introduci un maneho nobo. Si despues di nobenta dia ainda e doño no saca e auto for di warda, ta hib’e Daltra pa machica. Ta parce cu e maneho aki cu tempo a “la la” y awo un biaha mas e garashi di polis ta yen. Ta spera cu pronto, Minister Rocco Tjon dedica un poco tempo p’asina resolve e problematica aki.
