Artista visual Vanessa Paulina a presenta un buki special titula ‘Virginia, e rebelde di Aruba’ na Biblioteca Nacional Aruba. ‘Virginia, e rebelde di Aruba’ ta skirbi pa Jeroen Hoogerwerf y ilustracion ta di Vanessa Paulina. Un buki pa mucha nobo na 2 idioma, Papiamento y Hulandes.
Artista visual Vanessa Paulina a presenta su ilustracionnan pa e buki durante e celebracion di ‘Dia di Biblioteca’. Empleadonan di biblioteca ta celebra tur aña ‘Dia di biblioteca’ y ta para keto na e trabou di biblioteca y su servicio.
E buki ta conta e storia di Virginia, e rebelde di Aruba. Con el a lucha pa su libertad y a resisti contra opresion di su doño. Un storia di rebeldia, di resistencia y lucha contra inhusticia. E publicacion aki lo ta den coleccion den biblioteca pronto pa tur miembro por fia.
Prologo di sra. Xiomara Maduro, Minister di Finansa y Cultura: “Na Aruba tambe tabatin catibo. Investigacion den nos archivonan historico na Archivo Nacional Aruba, ta revela algun storia di e catibonan aki. E storia di Virginia Dementricia Gaai ta un di nan. Virginia tabata un mucha muhe catibo cu a rebeldia contra su doño, pasobra e tabata kier ta liber pa haci e cosnan cu e tabata haya bon. Varios biaha Virginia a wordo castiga pa falta di respet pa reglanan cu su doño a pone p’e como catibo. Sinembargo ningun castigo di sota di zwiep tabata por a stop Virginia di keda lucha pa e derecho di ta liber pa dicidi pa su mes.
Virginia su storia ta corda nos cu ta importante pa nos por dicidi pa nos mes. Cu nos mester percura pa semper nos keda gosa di e derecho aki, y pa nos no sucumbi pa lucha ora ta trata di nos libertad pa dicidi pa nos mes. Ta importante pa di chikito caba nos siña esaki. Nos no mester busca ehempel leu di cas, ya cu na Aruba mes tin ehempel di hendenan cu a sali pa defende e derecho pa dicidi pa nos mes. Virginia ta un di nan…”
