Diamars mainta Minister di Turismo y Salud Publico Dangui Oduber hunto cu su colega Minister di Enseñansa Endy Croes y sesenta alumno di EPI Horeca a haya invitacion pa bay riba e mega crucero di Carnival Celebration pa un presentacion, sigui pa un recorido.
Den e presentacion aki Carnival Cruise Lines por a mustra na tur e studiantenan tur e trabounan cu e crucero ta ofrece ora cu nan caba cu nan estudio. Tambe por a haya un bista amplio di tur e servicionan cu Carnival ta ofrece na su clientenan. Nan a haya un bista di con e bida ta ora biba riba un barco crucero. Pues a duna un splicacion amplio cu a duna na nos hobennan.
Minister Oduber ta hopi agradecido di oportunidad cu Carnival a duna na e sesenta studiantenan di EPI. Nan a haya un oportunidad unico pa conoce e mega crucero Carnival Celebration, un barco crucero basta nobo cu a drenta den servicio na aña 2022.
Segun Minister Oduber el a keda masha impresiona cu e luho y servicio cu e barco crucero aki ta ofrece. Locual mas a resalta segun e mandatario, t’e interes demostra n’e studiantenan.
Finalmente Minister Oduber a manda un danki na APA y Carnival Cruise Lines pa brinda un oportunidad unico na nos studiantenan. Esaki sigur lo sirbi como inspiracion y mustra nan riba otro oportunidad di trabou cu tin na momento cu nan caba cu nan estudio.
