“Tur hende tabatin miedo cu e proyecto hotelero na Sero Colorado lo no sigui. Pero cu e presentacion cu nan a duna a demostra cu e proyecto lo sigui apesar di pandemia,” Andres Hernandez, presidente di San Nicolas Business Association a bisa den un conferencia di prensa. Alejandro Murcia, representante di e desaroyadonan, tambe tabata presente.
Ta papia aki di e proyecto Secrets of Baby Beach cu tin e grupo Three Rivers Real Estate NV su tras pa desaroya un proyecto di 600 camber cu inicialmente mester a realisa su apertura na final di 2021.
SNBA ta hopi contento di e informacion cu nan a ricibi. E indicacionnan ta cu den e proximo 60 dianan ta bay tin hopi movecion den e area. No solamente esey, pero loke ta alentador ta kico esaki ta nifica pa mercado labora. E informacion cu SNBA a ricibi ta cu ta papia di trabou pa mas o menos 600 persona, mientras cu na final di e proyecto mester di 300 pa 400 pa e operacion diario di e hotel.
Hernandez a bisa cu e kier ta sincero y bisa cu un hotel asina grandi nunca tabata algo cu nan a pensa riba dje. Nan preferencia tabata bay pa facilidadnan mas chikito, manera Boutique Hotels.
Directiva di e organisacion ta contento di por mira basta movecion pa pariba di brug, specificamente San Nicolas. Ta papia di e Grupo Gianni’s cu tin un proyecto bunita tipo Boutique Hotel cu lo ta situa banda di Secrets of Baby Beach. Tin e grupo Azzure cu ta den liberacion cu gobierno pa bini cu Boutique Hotels,na e parti mas abou (Baby Beach). Por ultimo tin un grupo interesa pa bini cu un Health Hotel, un poco mas pariba di Secrets of Baby Beach, cu lo bini cu tur su facilidadnan medico. Y Marchand NV ta den proceso pa reactiva, cu ta ex Marchena Building cu ta situa memey di caya. Inclusive e tin un permiso di casino. Un compania di carga ya caba a cumpra ex Ice Plant cu tambe ta bay cuminsa cu un operacion pariba di brug.
El a splica cu lo bay amplia varios area cu no ta den uzo awo aki, pa haci nan un beach pa por acomoda tur hende. El a menciona e parti patras di ex Nanki Club y esun na Santana di Cacho. Esaki pasobra e hotel mes no ta pega riba e beach, ya cu e ta keda na halto. “E lo ta un poco druk, pero mi ta kere cu nos por comparti e espacio hunto cu e beneficio cu nos ta haya pa economia.”
Secrets lo bay tin un “spin effect” grandi pa San Nicolas, cu nunca antes a mira. Den tur e proyectonan aki, lo primordial ta cu e identidad di Aruba mester keda protegi.
