Diadomingo atardi banda di 4or a drenta informacion cu tin un grupo di basta brommer causando peliger. Nan actuacion peligroso mes a causa cu chauffeurnan responsabel a yama Polis.
Varios unidad di Polis a prepara pasobra e motociclistanan coriendo iresponsabel tabata riba Watty Vos Boulevard direccion pabou. Nan tabata hop riba caminda y blokia e rotondenan strobando otro usuarionan di caminda. Polisnan cu unidadnan di Noord, Playa y Santa Cruz a blokia algun rotonde na Sero Patrishi y tambe Tanki Leendert.
Ora cu e motociclistanan a sinti nan mes “changa” riba caminda, a move mesora pa purba scapa di Polis. A cuminsa un persecusion den diferente direccion. Den Tanki Leendert na dos diferente area a logra para dos despues di e persecusion y tambe den Sero Patrishi a stop uno. A detene tur tres. Entrenan tin homber y muher hoben. Tabata tin quadracer cu scrambler y scooter envolvi den e persecusion. E brommernan confisca di e tres motociclistanan ta scooter Gilera MFA-1690, otro brommer MFA-936 y tambe un scrambler geel cu preto sin number.
Cu takewagen a hiba tur tres vehiculo warda y aki fiscal lo bay dicidi riba nan. E otronan a logra scapa pero autoridad tin bista riba nan. Segun e investigacion di Polis, e grupo causando peliger cu brommer ta mayoria di San Nicolas. Danki Dios ningun hende inocente riba caya a resulta herida cu e forma iresponsabel di e hobennan motociclista aki. Hasta tin cu a manda brommer riba e auto di Polis ora cu tabata buscando nan. Un comportacion cu a haci e situacion pio pa nan mes.
