Dialuna mainta, den careda di 7:30 am, ora a habri e portanan di Pro-Catedral San Francisco, a constata cu un bentana parti dilanti tabata kibra. Ora a investiga mas leu, a haya cu aparentemente un hende desconoci a tira un boter di cerbes, kibrando e bentana di e parti dilanti di e tempel.
E dañonan principal tabata n’e bentana, cu e boter kibra paden, cu pida glas tur caminda plama. Mester a limpia esaki cuidadosamente, ya cu tabatin fragmento di glas riba banki y na varios partii paden, fuera di e pida di e glas mes di e boter y e glas kibra di e bentana gespart tur caminda abao. Tambe tabatin fragmento di glas pabo cu mester a piki. E comunidad di e parokia a expresa su indignacion pa falta di respet p’e cas di Señor.
Un adicto ambulante a comenta cu e tabata envolvi den un discusion cu un otro adicto. Durante e discusion, e contrapartido a manta un boter den su direccion, pero esaki no a alcans’e, impactando contra e bentana di e iglesia, kibrando esaki.
E incidente aki no t’e prome den e zona. Luna pasa, a reporta otro situacion di vandalismo den e edificio di Maria Convent, situa net banda di Pro-Catedral San Francisco. E biaha aki, algun individuo a kibra un bentana pa drenta den e convento cu e intencion pa horta. Tambe nan a causa daño n’e sistema di awa di e edificio. E tipo di incidente aki ta genera un sensacion di insiguridad creciente den e comunidadm causando molester y preocupacion entre e fielnan cu, ora yega trempan pa nan iglesia, ta haya nan tempel daña.
E reiteracion di e actonan di vandalismo aki a hiba e comunidad reflexiona riba e necesidad di mehora e medidanan di siguridad den e zona pa proteha e luganan sagrado y brinda trainkilidad n’e parokianonan.
