Diabierna a tuma luga e ultimo Rijksministerraad pa 2023. Den transcurso di siman tras di lomba, por a tuam nota di diferente atake di Prome Minister di Aruba, Evelyn Wever-Croes den direccion di Secretario di Estado demisionario, drs. Alexandra van Huffelen.
Premier a tilda Secretario di Estado di no ta domina e materia bon, esta e ley di LAft. Riba esaki Van Huffelen a bisa cu ainda e negociacionnan ta tumando luga. Sinembargo, riba e tereno aki no tin novedad.
E ta haya ta importante pa tin supervision, tanto riba Aruba como tambe e presupuesto di Hulanda, pa loke ta e disciplina presupuestario. Tambe den e paisnan di Reino.
CAFT
Tocante e presupuesto supletorio, secretario di estado demisionario a bisa cu CAft semper ta duna e bon consehonan n’e paisnan den Reino, pa haci lo posibel pa tin un finansa publico na ordo! Y esaki ta sinta den mas inversion, un accountantverklaring como tambe e reformanan. CAft ta haci esaki periodicamente y e biaha aki no tabata un excepcion.
Pa loke ta e atake di Prome minister di Aruba, Secretario di Estado a prefera di no reacciona directamente riba esaki. El a limita su mes cu e ta conta cu hopi bon consehero y tambe e ta bon na altura di loke ta pasa den e otro paisnan den Reino. Ta importante pa mantene un bon relacion entre tur e paisnan den Reino.
ULTIMO RIJKSMINISTERRAAD 2023
Por ultimo, Secretario di Estado demisionario a indica cu e biaha aki tabata un reunion basta cortico. A repasa e tratadonan, e plan anual di Guarda Costa. El indica cu manera tur sa, Hulanda ta totalmente comprometi pa cu e defensa di e costanan di e islanan Hulandes den lama Caribe.
Sigur, e Secretario di Estado demisionario a scoge pa keda diplomatico pa loke ta e atakenan di Minister-President, mr. Evelyn Wever-Croes. Pero tambe e expresionnan di Minister di Finansa, cu a compara e ‘strafrente’ riba e ‘coronalening’ cu e pasado colonial y di sclavitud .
Tur esakinan ta expresionnan cu no a cay den bon tera cerca e politiconan Hulandes, cu ta haciendo tur lo posibel pa mantene diplomacia. Algo cu sigur e politiconan local, ta haciendo cada biaha mas dificil.
TWEEDE KAMER
Diahuebs Tweede Kamer a scoge nan presidente nobo, den persona di Martin Bosman (PVV) cu ta conoci cu no tin mucho palabra bunita pa e islanan den parti di Caribe Hulandes.
Ta di spera kico e siguiente Rijksministerraad lo trece pa nos isla y nos di 24ora.com lo t’ey pa informa e pueblo.
