E cinco scenarionan cu SVB a duna riba un proposicion di Parlamentario Mike Eman presenta den un mocion pa aumenta pensioen ta mustra contenido di e mocion ta un locura, segun Minister di Adultonan Mayor, Ursell Arends, a splica den Parlamento diahuebs durante dia.
Minister Arends a laga haci un analisis y e conclusion ta cu esaki lo bay costa miyones. El a pidi e ciudadanonan pa ora cu nan topa cu e politico canando den bario ta haci promesa di aumenta pensioen, puntr’e con ta bay financia e aumenta di pensioen cu el a presenta den un mocion na Parlamento.
Durante e reunion di Parlamento riba presupuesto supletorio, e mandatario a bisa e echo cu AZV tin surplus, ta pensando pa parti di esaki wordo uza cu e grandinan no mester cubri nan remedinan.
Na momento cu Minister Ursell Arends a duna su comentario riba mocion di lider di e fraccion berde, e mes no tabata den sala di Parlamento. El a duna conseho negativo riba e peticion pa aumenta pensioen di behes cu 50% via di reparatietoeslag. “Eman ta experto pa hunga cu emocion di hende,” e mandatario a ripiti di e forma aki un expresion haci den pasado door di parlamentario independiente do Nascimento.
E mandatario a busca conseho di SVb cu a duna cinco scenario. Den aña 2023 e reparatietoeslag tin un costo riba presupuesto di gobierno di 42.8 miyon florin. Si bay di acuerdo cu e proposicion di Eman, esaki lo nifica un gasto pa gobierno di e reparatietoeslag riba presupuesto di 2025 y e suma ta 238.8 miyon extra. E costo adicional aki na 2030 lo bira 282.5 miyon florin. Esey ta si bay di acuerdo cu e aumento di 50% pa e suma di pensioen.
Si duna un aumento di 359 florin entrante 2025 y 359 florin den 2024. E lo cay pa presupuesto di pais Aruba y e lo tin un costo e aña’ki di 142.3 miyon, na 2028 e lo subi na 266 miyon florin y pa 2030 e gasto di gobierno lo bira 282.5 miyon florin pa aña.
Den escenario 3, e lo nifica un aumento di 50% entrante aña 2025, aplicando inkomenstoets a traves di e reparatietoeslag e lo nifica e aña’ki un aumento di gasto di 142 miyon florin y pa 2030 e lo tin un aumento di 197.7 miyon florin.
Scenario 4 cu ta un aumento di 359 florin entrante prome di januari, 2025, y e otro aumento igual na 2028, lo nifica un aumento di gasto den 2025 di 99.6 miyon florinma 2028 un aumento di 186.5 miyon florin y na 2030 un aumento di 197.7 miyon florin.
Scenario cinco ta si SVb carga e gastonan via di e fondo di pensioen di behes, pa 2026 caba e fondo lo ta bancarota. “Esaki ta proposicion di e mocion di Mike Eman. P’esey awe e no t’ey awe den Parlamento. Ora e drenta bario puntr’e con e ta bay paga pa su mocion.”
