Hunto cu personanan cu tabatin un nificacion special pa e organisacion, UNOCA a celebra nan 38 aña di existencia cu un sorpresa, cu tabata nan logo nobo.
Union di Organisacionnan Cultural Arubano (UNOCA) a celebra un echo special e siman aki. E directora Ray-Anne Hernandez a splica cu a celebra cu 38 aña pasa a funda e organisacion pa percura pa desaroyo cultural di Aruba. Mas ainda despues di Status Aparte.
Na mesun momento a probecha di e celebracion pa lansa un logo nobo, masha colorido pa representa positivismo, union, creatividad di artesano y artistanan.
UNOCA a dicidi pa dedica e anochi aki na Nilda Koolman, un persona cu a haci hopi pa e organisacion y artistanan di Aruba, incluso despues cu el a retira caba. Ray-Anne Hernandez a conta cu Nilda Koolman tin un trayecto largo como miembro of formando parti di e directiva di UNOCA. Hasta despues di su retiro el a keda conseha e organisacion di e miho forma pa sigui bay dilanti.
Durante e anochi aki tabata presente diferente persona miembronan di staff y personal actual y di pasado. Un di nan ta ex-Gobernador di Aruba, Fredis Refunjol, kende a ricibi e prome t-shirt cu e logo nobo riba dje. “Nos a tuma un momento pa recorda hopi di e miembronan di directiva y personal cu a fayece.”
Por spera hopi trabou mas na caminda pa desaroyo cultural na Aruba, e directora a bisa.
