Na Universidad di Aruba a organisa conferencia di ‘Studiesucces Caribische Studenten’ p’asina atende riba e pasonan concreto pa ora studiante bay studia na Hulanda. A conta cu participante di Aruba, Corsou, Boneiro, Sint Maarten y Hulanda. Ta busca pa haya e miho manera pa yuda e studiantenan y pa nan ta exitoso na Hulanda.
Ron Bormans, presidente di Regiegroep y College van Bestuur Hogeschool Rotterdam, a splica cu e conferencia tabata p’e personanan cu ta responsabel pa educacion dje islanan pero tambe na Hulanda. Loke nan ta purba haci ta mehora e posibilidad dje studiantenan di e isla p’asina mehora nan exito. Ta haci esey pasobra ora haya sa cu hopi studiante ta bon prepara, pero tambe den cierto aspecto no y mester ta miho prepara. Tambe e forma con ta atende y yuda e studiantenan na Hulanda. No por lubida riba e parti di idioma cu mester mehora.
Bormans a splica p’esey nan ta aki y pa tuma claramente un decision riba e asunto aki. E paisnan a bini hunto pa asina mira con pa tin un miho programa, yuda e studiantenan mehora cu e idioma, manera ta yuda nan cu cas y etc. E barera cu ta impone riba e studiantenan pa ta exitoso na Hulanda ta halto y kier baha nan. Francis de Lanoy, Regiegroeplid y Rector Magnificus University of Curaçao, a indica cu esaki ta un esfuerso di e seis islanan, Aruba, Corsou, Boneiro, Sint Maarten, St. Eustatius y Saba. Nan a sinta hunto cu Hulanda pa papia riba e problematica aki ta algo importante y bon. Hopi biaha nan ta haci cos separa, pero awo cu ta hacie hunto, awo por sa kico tin di prepara riba dje y tambe kico ta spera di nan. Asina aki ta haya e sincronisacion y ta logra un sinergia increibel.
