Despues di 3 siman di preparashon intensivo, por a conta cu un atardi bon organisa, yen y cu hopi entusiasmo.
Den presencia di staff, ex-directiva, miembro y futuro miembro nan, e atardi a cuminsa.
Bou guia di e moderador Steve Geerman, a habri e atardi saludando tur presente y cu un momento sagrado pe e Himno Nacional di Aruba.
Despues a sigui cu e prome parti di e atardi, cual ta e huramentacion oficial di señorita Natasha Henriquez, cual a sigui e trajectoria necesario pa forma parti di ACHA.
E procedura aki a wordo eherce bou guia di ex-presidente Judrick Gario y ex-secretaria Natalie Stokes.
Sigientemente a pasa pa e parti di eleccion, caminda tabata tin speech, pregunta y ponencia nan debativo entre tur e cantidato nan pa nan respectivo position.
Despues di e votamento y conteo, e resultado nan tabata lo sigiente:
Presidente: Chloe Ruiz
Vice Presidente: Judrick Gario
Secretaria: Paula Castillo
Tesorero: Marie-Jaindrah Gomez
Vocero: David Quant
A haci tambe un reformation di tur comision, caminda miembro nan y futuro miembro nan por a scohe den cua comision nan lo kier forma parti di dje.
E comision nan cu e hoben nan por a scohe di dje ta lo sigiente:
Comision Minister Hubenil
Comision Summer Courses
Comision Election Escolar
Comision Bonding
Comision Relation Publico
Comision Reglementen
Comision Fundraising
Comision Cas
Despues di esaki a sera e parti oficial y despues a pasa pa e “after party”.
Caminda e hoben nan a disfruta di snack, musica y gobersashon nan ameno.
Por ultimo, pa pone e cherry riba e bolo, Staff a surprise tur hoben presente cu un instrcutor cu a duna e hoben nan les di baile.
Parlamento Hubenil Aruba kier felicita e directiva nobo y desea nan lo mihor pa cu e trajectoria nobo aki.
E meta principal di e directiva nobo aki ta pa stabilisa e asociasion y hisa e reconocimento di Parlamento Hubenil Aruba den media y pueblo.
Pues Aruba, keda pendiente pa locual e hoben nan aki lo trece pa nos communidad.