Awe durante dia na aeropuerto di Schiphol a tuma luga un incidente lamentabel. Segun informacion ricibi ta trata di un persona cu a bay den e motor cu tawata draai di un di avion di KLM Cityhopper y a fayece di forma tragico. Autoridadnan no a duna nada di conoce di e circunstancia di e victima na e momento aki. Ta investigando pa determina kico a tuma luga.
E incidente a sosode banda di e “brug” riba e pista na e aeropuerto, na momento cu e avion tawata preparando pa haci su salida pa e destinacion di Dinamarca.
Aeropuerto di Schiphol a duna di conoce pa medio di un reaccion cu “awe a tuma luga un incidente horibel cu un persona a bay den motor di un avion. Nos pensamentonan ta bay na famia di e fayecido. Koninklijke Marechausee ta investigando e incidente aki. Marechausee a duna di conoce cu tur pasahero y miembronan di tripulacion cu tawata a bordo a ricibi atencion.
Minister demisionario Habers (Infrastructuur en Wanterstaat) a duna di conoce pa medio di e plataforma X (Twitter) di e noticia horibel aki. “Mi palabranan di condolencia ta bay na famia di e victima y na e personanan cu tawata testigo di e accidente aki.”
E instancia Hulandes cu ta atende cu aspectonan di siguridad: “Onderzoeksraad voor Veiligheid” a manda 3 investigado pa aeropuerto di Schiphol. KLM Cityhopper ta bula cu avionnan chikito di e fabricante Brasilero “Embraer” cu tin un capacidad di por acomoda entre 88 pa 132 pasahero.
Esaki ta un noticia den desaroyo.
