Desde cu a lansa e proyecto piloto di E-Government plataforma di interoperabilidad na luna di januari, por anuncia progreso di e proyecto ta na mita caminda. Di e forma aki ta continua cu e di dos fase di e proyecto piloto pa transforma Gobierno su maneho den uno digital cual lo agilisa trabou entre departamentonan di Gobierno pero tambe mehora e servicio na comunidad.
Na e momentonan aki e proyecto piloto, bou guia di e project manager di e proyecto piloto Yuri Feliciano, ta limita na cuatro departamento di Gobierno cu ta participa esta: DIMAS, CENSO, IASA y DVG. Esaki ta haci posibel pa test e diferente aspectonan tecnico di e plataforma y brinda e stakeholdernan e posibilidad pa conecta nan sistema di informacion a traves di metodonan hopi sigur riba e plataforma di interoperabilidad.
Den futuro, unabes cu otro stakeholders tambe cumpli cu e rekisitonan den e departamentonan, nan tambe por wordo integra den e platafroma.
Durante di aña tabatin diferente tayer / sesion di entrenamento cu a tuma luga, den cual a trata entre otro: con pa transforma un Gobierno den uno digital cu e ayudo di UXP software y a brinda entrenamento na e empleadonan (mas cu 85 participante a forma parti di diferente workshop).
Importante pa menciona cu ya a pone e sistema na prueba entre DVG cu IASA cual ta haci e “proof of concept” di e UXP real/factibel. Esaki ta hustifica tur e trabounan realisa di añanan anterior cu ta haci cu awor por bay door na di dos fase di e proyecto piloto.
E proximo pasonan ta encera continuacion cu entrenamento na empleadonan, tambe lo continua cu desaroyo di e sistema pa intercambia data entre e departamentonan den forma sigur, ademas lo duna inicio na e di dos fase di e proyecto piloto. Di e forma aki Aruba ta un paso mas cerca di logra introduccion di un gobierno digital. E-government ta esencial pa e futuro di maneho eficiente den Gobierno y ta necesario pa e rumbo di Aruba y e metanan cu tin pa alcansa teniendo na cuenta cada sector di nos Pais y ciudadanonan.
Minister President, Evelyn Wever-Croes: “e-Government no ta solamente un plan strategico di Gobierno di Aruba, e ta bay ta un cambio essencial den nos manera di traha y un cambio crucial den nos manera di pensa. E cambionan cu ta biniendo riba nos ta cambionan indispensabel y esakinan ta cambionan cu ta dirigi pa un miho maneho di Gobierno di Aruba”.
