Diahuebs anochi un biaha mas tabatin un candela na Daltra NV. A mobilisa cu maximo urgencia tanto polis como brandweer n’e sitio. A dura e bomberonan dos ora y mey pa por a combati e candela.
Den careda di 11:00 pm e yamadanan a cuminsa drenta di candela, unda cu tanto polis y brandweer a presenta na e sitio. Prome a despacha dos unidad di truck di brandweer pa combati e candela. Na sitio mes a pidi p’un di tres truck pa asina nan por tabatin extra awa. Pa por a yega na e candela mes, a pidi Daltra pa un excavator, p’asina hala e metalnan fo’i otro.
Esaki sigur ta causa molester y peliger grandi p’e habitantenan, como tambe e companianan cu ta den vecindario.
Na augustus di aña pasa tabatin un candela grandi riba e tereno di Daltra NV, caminda cu varios autoridad a presenta pa duna un man. E candela aki tabata asina grandi cu e trahadonan di e compania na banda, esta Apex, a duna un man no solamente pa yuda paga e candela, pero pa evita cu esaki pega e warehouse na candela.
