Diasabra tabata dia cu a hiba difunto Rosario Luis ‘Hulk’ Geerman sosega. Prome cu a sali pa misa a pasa na e post di Brandweer unda cu el a traha, cual ta post Sierra na San Nicolas. Aki a brind’e un homenahe posthumo.
Efraim Tromp, un colega di ‘Hulk’, a duna un discurso hopi emocional, unda el a duna un relato breve di e comienso di ‘Hulk’ den Cuerpo di Bombero y varios anecdota di su bida den su trabao.
Durante e ceremonia cortico, tabatin entregamento di areglo floral di parti di tanto Cuerpo di Bombero, como tambe sindicato di Bombero SINBA y BASA (Bombero di Aruba Social & Activo). Na final tur hende presente a lanta para pa asina haci e oracion di Bombero.
Despues di e ceremonia chikito aki, a bay Misa Inmaculada Concepcion na Santa Cruz, unda cu a tuma luga despedida y e Santo Sacrificio di Misa pa despues hib’e na su ultimo luga di sosiego.