Un tankero bao bandera Panameño a bati alarma na autoridad maritimo na Corsou RCC y Wardacosta, cu nan tin un problema y nan a causa un oilspill den lama. Ta trata aki di un tankero di casi 100 meter di largura y casi 15 meter di hancho, cu a sali for di e refineria di Amuay, cu fuel aparentemente diesel, pa bay direccion Republica Dominicana.
El a sali dos dia pasa, pero no a yega na su destino na ora. Den e proceso ta bati alarma cu basta fuel lo a basha den lama. Aparentemente intencionalmente, mester a bash’e, pasobra e barco na dado momento no tabata balansa. Pa balansa e boto, mester a actua asina aki, basha fuel den lama, causando un derame entre Aruba y Corsou y probablemente e spill aki ta biniendo direccion Aruba.
No ta fuel pisa, pero tur cos ta mustra cu ta diesel cu tabata transportando for di Amuay pa Republica Dominicana y den e proceso a haye den e situacion aki. Rampenbureau di Aruba tambe ta na altura. A actua segun e reglanan rekeri. Wardacosta tambe ta mirando e situacion pa analisa kico por ta e daño riba lama y con grandi e oilspill ta.
Mientras tanto e capitan a bisa cu e ta bayendo bek Venezuela. E no a sigui su rumbo pa Republica Dominicana, aunke den e dos dianan aki e mester a yega ey caba.
No ta descarta cu den e proceso nan ta haci transbordo tambe riba lama, den un forma sospechoso, mirando e diferente cosnan straño cu ta pasa cu gasolin, diesel, etc. for di e pais bisiña Venezuela, pa loke ta crudo, etc. riba lama.
Ta tankeronan cu ta sali pero ta tarda pa yega nan destino, manera tabata e caso di e boto aki cu yama President, bao di bandera Panameño. Awo e ta regresando Venezuela, pero e capitan mes a bisa cu el a logra controla e situacion, pero el a laga daño si den lama y a bati alarma na Corsou, cu na su turno a notifica Wardacosta y di su parti a notifica Rampenbureau.
Na Aruba ta na altura di loke ta pasando y ta monitor henter e proceso di e movecionnan di e oilspill y pendiente kico ta bay ta e pasonan cu lo tuma contra esunnan cu ta responsabel pa e tankero President.
