Algun siman atras drs. Ryçond Santos do Nascimento a tuma e decision di bira parlamentario independiente, unda el a bandona partido AVP. E ta sinti cu su decision ta uno bon tuma. E ta opta pa sigui den e mundo di politica y ta den combersacion pa forma parti di otro partido.
Santos do Nascimento a splica na nos redaccion cu prome el a sali for di partido, ya el a pone e ponencia cu “partido ta kies pa berdad of no. Partido ta kies pa integridad of no.” Ainda partido AVP no a tuma ningun posicion cu e cuestionnan aki. Ainda no a cuminsa cu ningun cambio real den e partido, p’esey su decision tuma ta uno corecto. E ta spera cu e por tin un impacto a plaso largo p’e partido. E ta lamenta cu un partido di plataforma asina grandi, un potencial asina grandi pa haci algo bon pa Aruba, no ta tuma e curashi pa cambia e cosnan cu mester cambia den e partido.
Futuro
E parlamentario independiente a tuma e decision di keda den parlamento. Santos do Nascimento a indica cu el a tuma e trabou na serio y ta sigui den e mesun forma. Tambe mas y mas e ta convenci cu e mester keda den politica di Aruba. E ta haciendo e pasonan necesario pa sigui den esey y contribui na cambio den politica aki na Aruba.
Diferente combersacion
Segun e parlamentario, e tabata tin varios combersacion cu diferente partido y persona. E combersacionnan a bay ameno. Awo e mester considera tur combersacion y palabracion. Tambe e mester considera kico ta e cosnan mas importante pa su persona. Santos do Nascimento a tuma su decision a base di principio pa sali fo’i AVP.
E no a tarda manera e echonan a presenta. El a tuma su decision pasobra esey tabata basa duidelijk pa loke e ta para p’e. E ta haya cu no ta necesario pa keda den politica simplemente pa keda den politica. Si ta keda den politica, esey ta pa tin un impacto p’e futuro di e pais pasobra Aruba mester di un cambio.
E no a descarta e parti di lanta un partido nobo. Esey ta un opcion cu a mira hopi di cerca. E ta parti di combersacion, pero tambe tin e parti di otro aliansa. Na final di dia, e plataforma cu por garantisa e principionan ta keda intacto. Tambe cu nan por hiba un mensahe di reforma no solamente na nivel di gobernacion, pero tambe na nivel di politica.
E parlamentario a enfatisa di a papia cu tur hende, pero e no a sinta cu lider di MEP. Den e ultimo dianan el a papia cu hopi hende y e no a duna mas informacion. E mester papia y scucha como mira tambe con nan tin impacto den politica di Aruba.
Combersacion cu Gerlien Croes
Pa loke ta combersacion cu Gerlien Croes, Santos do Nascimento a indica cu esey ta den plan di kico ta e intencion, kico nan lo haci of no haci. Nan no a combersa riba esey.
El a recorda cu Croes a sali despues di su persona y a tuma su tempo pa tuma un decision. E lo papia cu Croes, pero kico lo sali di e combersacion ey e no por bisa. Ambos parlamentario tin un pensamento, y segun Santos do Nascimento, den politica no tur ora ta di acuerdo cu otro ni ta wak cos mescos cu otro. Tambe mester mira kico ta e common ground, di cual nan dos tin hopi mesun cos.
