E ta cos cu tur hende por nota inmediatamente cerca cada mucha si su mayornan a lant’e den respet y obediencia na Dios. E ta manera un fruta cu mester cosecha, cual ta identifica su mes di leu.
Un mucha cu sali bon educa for di su cas cu norma,balor y etica na luga ta un piedra precioso pa comunidad.
Hopi hende no sa cu ta un mayor su deber di lanta su yiu den caminda di Dios y sina su yiu obedece Dios, pasobra si e keda sin hacie e yiu su chens di trompica den bida ta hopi grandi,
Awendia mayornan kier duna mucha tur cos, tur locual ta material y ta lubida locual e palabra di Dios ta bisa den Proverbionan 22:6: “Instrui un mucha den e caminda cu e mester cana y hasta ora e bira bieu e lo no aparta su mes for di dje.”
E palabranan cu mi ta ordena bo, mester ta riba bo curason. Siña nan cu tur diligencia,na bo yiunan y papia di nan ora bo ta sinta den bo cas, ora bo ta cana riba caminda, ora bo ta bay drumi y ora bo ta lanta.Mara nan como señal na bo man y como un banchi na bo frenta. Skirbi nan riba e kozijn di porta di bo cas y riba bo portanan di cura. (Deutoronomio 6:7-8).
Awo tur hende ta ripara con importante e palabra di Dios ta pa hubentud, pasobra un hubentud cu conoce Dios, no ta cay den e trampanan fastioso cu diabel ta pone pa nan.
*Un hubentud cu conoce Dios no ta facil pa e cay den e trampa di genero of duda den su identificacion sexual.
*Awo tur hende ta nota cu e plan di saca Bijbel for di scol y hasta tin hopi cu a saca Bijbel for di cas, ta un plan siniestro, pa evita nos muchanan di conoce Dios y asina por yena nan mente y curason tur tur clase di bagamunderia y inmoralidad.
*Un hubentud cu conoce Dios, dificilmente por cana den caminda di droga, arma, violencia, y matamento.
* Un hubentud cu conoce Dios no ta falta respet na su mama y su tata, pero ta honra su mama y su tata cual ta mandamento cu promesa di Dios, pa tur cos bay bon cu ne (Efesiona 6:1-4).
E cos aki no ta wega ni tampoco fanticada religioso, e ta un gran berdad cu aworaki mas cu nunca ta wordo sinti den nos comunidad y cu tin hopi hogar cu man na cabes.
*Tin un urgencia den nos comunidad pa bolbe bek na Dios, tin un urgencia den cada cas di Famia pa pone Cristo Hesus na prome luga den cas y sirbi Dios di henter nan curason.
Nos nivel di obediencia na Dios a cay formalmente, wak bon con e uzo di alcohol ta bao di nos hubentud. Nan ta bebe manera hende cu kier caba cu alcohol, sin speransa y sin conocemento.
* Ningun mayor no por culpa ningun instancia, gobierno of esun cu ta bende alcohol cu nan yiu ta cana burachi, e falta ta di bo mes como mayor cu no a sigui e palabra di Dios, ni tampoco a aplic’e den bida di bo yiunan.
Aki nan e responsabilidad di mayor ta sali pa dilanti, pasobra locual bo sembra bo ta cosecha, pero awo nos tur ta mira cu si nos como mayor no sembra bon simia di e Palabra di Dios den nos yiunan, e bida lo ta duro pa nan y dolor pa nos como mayor.
Sinceramente, Pastor Marcel Balootje
