Pa hopi aña, ‘Mama Frida’, of Señora Frida, tabata un persona di tur hende, un persona semper alegre cu ta duna bo gana di bin traha. Esey segun su ex colega Juancito Giel a expresa durante condolencia dilanti di Canal 90, unda cu a bini cu e curpa di Frida Chirino pa su ultimo despedida den presencia di tur ex colega y amistad di Voz di Aruba AM.
E programacion di entiero di Mama Frida a cuminsa na Aurora Funeral Home pa 12’or di merdia, di eynan a sali bay cu ne na su cas, despues a pasa Canal 90 unda tur colega y amistad a bin duna nan respet. Pa 1’or di merdia a yega Misa San Francisco, y finalmente e Response y salida pa Santana Catolico di Playa pa 3’or di atardi.
“Semper e tabata tin algo alegre pa conta bo, semper algo leuk. Un persona cu semper tabata stima su trabao, pa Frida no bin traha, e mester ta malo di berdad,” Giel ta bisa. Hopi ta bisa cu e sla di mas grandi pa Frida tabata ora cu el a perde su casa pero asina mes el a demostra forsa y esey no a kita su animo pa bin traha. “Un shon di hende. Na su famia y su yiunan palabranan di forsa den e dianan dificil aki, cu mama Frida descansa na paz.”
Elsa Krosendijk a comparti 20 aña cu Mama Frida na Canal 90, “un persona unico, trankilo, wantado di secreto,” segun Krosendijk. Mama Frida tabata un hende semper fuerte para riba su pia y no tabata worry pa bay guera. “Tin biaha nos tabata pasa ariba otro tambe pero esey ta ‘part of the game’ pero el a traha cu nos pa 60 aña, y den mi caso cu mi como hefe pa 30 aña,” segun Leoncita Arends. “E señora aki no tin mas palabra pa gradici su lealtad pa nos compania, pa cu locual ta Canal 90, Voz di Aruba, Interprint y lealtad n’e empresa aki.”
Algo cu varios colega por comparti ta cu Mama Frida sigur tabata un persona cu a forma hopi di e coleganan cu su caracter fuerte, poniendo nan para caminda nan mester para.
Sea bo conoce siendo colega como “Mama Frida” of siendo cliente como Señora Frida, echo ta cu tur hende cu a sea traha of haci negoshi cu Radio Voz di Aruba 1320 AM of cu Canal 90 FM, lo a yega di atende cu e gran dama aki.
TOCANTE MAMA FRIDA
El a cuminsa traha na Voz di Aruba na aña 1958 tempo di Watapanagezaag como secretaria di e emisora di radio. Esey ta e ex-ward’i polis den Wilhelminastraat. Na aña 2018 el a baha cu pensioen, despues di a traha no menos cu 60 aña pa e compania. Ta un persona cu un caracter fuerte cu a traha bao di guia di Don Albertico Arends y señora Irena Arends. Practicamente el a mira tur e yiunan di e pareha Arends lanta for di chikito. Frida Chirino tabata encarga cu e propagandanan di Voz di Aruba cu despues a bira Canal 90 FM. E tabata un berdadero pilar den e emisoranan aki. Den esey por bisa cu tur humildad cu el a traha cu tur e personahenan mas conoci den radio y prensa di Aruba. Tur a siña algo for di dje durante nan trayecto impresionante den radiodifucion.
Headlines Group, e cas editorial di e medionan mas grandi di Aruba, esta 24ora.com y Trempan.com ta expresa palabra di profundo condolencia na su famia. Por lo menos dos di e directornan di nos compania awe a traha masha di cerca di dj’e. Cu Mama Frida sosega na paz.
