Dia 29 di juni, Aruba Entertainment Center lo ta sede di un di e peleanan mas grandi cu Aruba a yega di conoce. Aruba ta den gara di e competencia aki. E promotornan di Victory Extreme Figthing Championship (VXFC) ta den full preparacion pa presenta un magno evento di Extreme y MMA pa e pueblo di Aruba.
EVENTO
Jerall Maduro, miembro di e organisacion a indica cu e anochi aki lo tin 34 bringado, es decir 17 pelea, den un solo anochi. Lo tin tres pelea pa titulo, e mihonan di Aruba lo bringa e anochi aki. Tur cos ta cla p’e anochi aki. Nan ta un team chikito, pero cu ta trahando duro, dia aden, dia afo. Ya caba ta bezig ta rond af,wardando pa e dia yega.
Hopi biaha den e eventonan aki ta haya cu e bringadonan ta mama gay di otro, cual ta parti di e evento aki. ta algo cu tur hende conoce ora cu ta trata di MMA. Si Maduro a subraya cu nan lo no tolera niun situacion cu presenta durante e evento. Tur hende ta bonbini pa bin wak e evento, bin disfruta di e peleanan. No ta bay tolera niun sorto di fechoria. Tur cu bin ta pa bin wak y disfruta di e peleanan. E anochi aki lo tin bringadonan cu tin varios luna ta preparando p’e anochi aki.
Tur cuater seccion di VIP ta completamente bendi (sold out). A keda solamente e parti di ringside y tambe seccion general. Carchi ta obtenibel na Ritz Boulevard, Ritz Dakota y tambe na Ritz Savaneta.
CARCHI FALSO
Victory Extreme Figthing Championship (VXFC) tambe a tuma nota cu tin carchinan falso ta circulando, cual Maduro a indica cu como organisacion nan ta na altura di e problema aki y cu nan tin e metodonan pa verifica cada carchi. Y esun cu a cumpra un carchi, falso, lastimamente lo keda afo di e evento.
