E fin di siman nos dilanti, lo tin e di diescuater edicion di International Regatta, cual evento lo cuminsa diasbara 29 di juni cu diescuater clase di careda: Optimists, SailQube, F11, Beachcats, Sunfishes, Lasers, Yachts Racing, Yachts Live Aboard cruisers, Yachts Multihulls, Miniatuurboats (30-35-40 inch), Windsurfers y Kites.
Rick van der Vaart, Presidente di Aruba Regatta, un biaha mas ta organisando e Aruba Regatta cu mas di 70 participante. Aruba ta bendiciona c’un bunita lama, bon tempo cual ta duna e oportunidad pa tanto mucha como adulto por participa n’e evento. Esun cu ainda no a inscribi, tin te diasabra mainta 9:00am pa haci esaki.
Tur esunnan cu a inscribi caba, diabierna a pasa busca nan ‘goodies’, nan regalo, un bunita poloshirt y e bedoeling ta pa tur bin hunto pa asina habri e Aruba Regatta oficialmente.
TOKEN DIGITAL
Un novedad cu Aruba Regatta a bin cu ne e aña aki ta cu loke nos a conoce den pasado, e asina yama tokens, a keda den pasado. E aña aki nan a bin cu innovacion tecnologico, caminda ta pasa e placa den un armband (wristband) y ta bay n’e bar, ta tap & drink of tap & eat.
Aruba Regatta ta traha hunto cu CX Events, cu ta conoci tanto na Aruba y na Corsou, cu ta haci uzo di e tecnologia aki. Kier hacie mas facil pa tur hende gosa, unda cu no tin placa (cash) envolvi, pa stroba e publico di gosa e evento aki.
VARIOS CATEGORIA
Aruba Regatta tin diferente clase di diferente tipo di boto, for di boto miniatura, race, yate grandi, etc. pa por competi honestamente, mester pone tur e botonan di e mesun categoria competi contra otro. Esey ta rekeri cu ta organis’e cu tur hende ta keda apart y no ta stroba otro. Aruba tin un lama grandi, lagun y ta hopi contento di por organis’e un biaha mas pa Aruba gosa di e deporte di vela.
Meta di e evento ta pa trece tur hende hunto, n’e fiesta, e celebracion di e deporte di vela. Pa e muchanan por wak con e adultonan ta gosa di nos naturalesa, di e biento y e lama. E no ta algo cu ta haci tras di computer. E no ta un deporte facil, e ta duro pa por maneha e boto den Aruba su biento duro.
Riba diasabra 29 di juni tur Class Sailing Races lo tuma luga for di 9:00 am – 4:00pm sigui pa Live Music alrededor di 5:00pm – 9:00pm cu HAERFEN POP ROCK & BLUES Band.
Riba diadomingo 30 di juni, henter dia lo tin All Class Sailing Races cu caredanan tumando luga for di trempan 9:00 di mainta pa 3:00 di atardisigui cu Live Music entre 5:00 di atardi pa 9:00 di anochi cu The Originalz Band.
E ceremonia di premiacion di Regatta lo tuma luga diadomingo 30 di juni, 5:30pm pa 7:00pm (Youth 5:30pm; Adults 6:30pm.)
ARF, Aruba Regatta Foundation su vision ta pa introduci mas hende na nabegacion y hiba nan mas cerca di naturalesa y experiencianan di watersport sostenibel. Regatta ta desea na yega na mas hende hoben cu ta posibel anto introduci e alegria di nabegacion na nan tur.
Na 2023, 75 nabegado a participa den mas cu cuarenta careda, durante dos dia yena di accion y premia nan 27 trofeo, specialmente diseña pa Regatta, traha pa medio di plastic y palo recicla.
Pa 2024, Regatta su meta ta pa atrae mas nabegado, boto y publico n’e Regatta Village, cual ta situa cerca di Surfside Beach banda di Neptali Henriquez Park.
