Un carta di gremio comercial, esta Aruba Hotel & Tourism Authority (AHATA), ATIA y Camara di Comercio, a bay pa Prome Minister y Parlamento y e intencion di esaki ta pa delinea e opcionnan cu Aruba tin. AHATA a ripara cu ainda tin hopi hende no a realisa cu Aruba ta pasa den un crisis global di un magnitud historico.
Esey ta pone Aruba den un situacion diferente di cualkier otro dia ora ta papia di economia. Tisa LaSorte, CEO di AHATA, a bisa cu e peliger di esaki p’e economia ta afecta tur hende. El a sigui bisa cu aki ta papia perdemento di trabou, companianan mester cera y ta algo cu ta afecta hende, afecta henter comunidad. P’esey e gremionan kier a delinea e opcionnan cu tin den un situacion di cual Aruba a hay’e den dje.
Pa corda hende riba e dos opcionnan, cual e prome ta cu Minister President a logra un dialogo cu Hulanda. E ta dialoga cu Hulanda y purba yega na un acuerdo di mas miho posibel pa Aruba. AHATA ta apoya esaki, ta un logro di Minister President. Nan ta apoya e esfuerso pa por yega na algo y un acuerdo cu ta miho posibel pa Aruba den e circunstancia aki. E di dos opcion ta pa no bin cu un acuerdo y esey lo pone Aruba den un situacion pio ainda prome cu Hulanda intermedia via un statuut. E di dos opcion ta cu na e momento ey cu Hulanda mester intermedia y tuma over, Aruba tin menos participacion den gobernacion.
AHATA ta compronde di tin un resistencia p’e hecho cu ta impacta e autonomia politicamente, pero e opcion di nenga un acuerdo ta pio. Esey lo pone Aruba den un situacion pio ainda. AHATA ta di pensamento pa gobierno bay p’e prome opcion y yega na un acuerdo di mas bon posibel pa Aruba, den e circunstancia cu tin pa loke ta dialogo cu Hulanda. Tambe pa acepta mas lihe cu ta posibel pa por firma y cuminsa cu un entiteid pa yuda institui cambionan na Aruba cu ta bon.
Ora di mira e landspakket, a mira cu tin cambionan bon pa Aruba y hopi entidad a yega di bisa cu esaki mester pasa. Temporalmente e ta algo penoso y cambio den nos supuesto autonomia, pero AHATA ta mira esey como algo temporal cu ta pone Aruba den miho posicion a largo plaso. E opcion 1 ta e miho opcion cu Aruba tin actualmente.
Tisa LaSorte a sigui bisa cu si no firma cu Hulanda y laga cos bira pio, lo yega na opcion dos cu ta default. Ta trata algo di economia y no algo di defende interes comercio. AHATA ta spera cu tur hende tin e interes di Aruba general na pecho y no interes personal. Pero pa tin interes general y asina ta sigur cu e economia, unda cu mas tanto posibel por scapa trabou y por tin actividad economico. E actividad economico ey ta duna cu hende tin entrada, cu gobierno tin entrada y por inverti den economia di Aruba.
