Durante luna di juli Aruba a haya cuater barco crucero, di cual tabata un pa siman. Esaki a pone cu e comerciantenan di Welcome Plaza a cuminsa habri nan kiosco bek, pero solamente ora tin barco.
Trudy Lampe ta un artesano y comerciante di Welcome Plaza. El a conta cu su situacion no ta uno facil, pasobra loke el a cera cu ne pa luna no ta yega ni pa paga huur. E ta contento cu a bin barco y cos a cuminsa lora, pero asina mes no ta suficiente. Su luga riba Welcome Plaza ta ubica patras y tin biaha e no ta haya cliente. Na momento cu e barco di Carnival Cruise ta den waf, e ta haya benta. Pero di e otro cruceronan no ya cu e tour operators ta bay cu nan.
Un otro punto fastioso cu e ta haya ta cu baño no ta accesibel p’e turistanan cu ta puntra pa uno. Esaki ta un problema cu no ta di awo. A acerca minister president, a manda carta, a papia cu e mandatario cu tabata atende cu infrastructura. Pero no a haci nada. Nan kier mira un solucion pa loke nan ta pasa aden. Aunke cu tin turista, nan no sa cu tin e kiosconan di Welcome Plaza. Segun Lampe, e asociacion di Welcome Plaza a papia cu minister presidente riba nan situacion. Pero e mandatario a manda tur cos bek den scochi di director di DIP y ainda no a haci nada.
E tin miedo cu si bin un di tres ola di Covid-19 nan a caba. Esaki lo pone cu e tin di bati bancarota, ya cu su reserva no t’ey mas. A pasa mas cu un aña cu nan tabata cera, pero nan ta di pensamento cu awo por cuminsa move bek. Pero e cosnan cu mester pa move. En caso cu si pone borchi mucho pafo, ta manda nan kit’e.
Pa cobertura mas amplio, lesa e edicion di TREMPAN mañan.
