Pa prome biaha e tres principal mercadonan, Nort-America, Europa y Latino-America, a uni den un conferencia. Aruba Global Travel Conference na Hyatt Regency Aruba Resort Spa & Casino, a trata topiconan di strategia, metanan, y kico ta proyectando como ATA pa Aruba su turismo den 2024.
“Nos a probecha tambe pa inicia nos celebracion den cuadro di dia internacional di turismo otro siman, y nos a invita diferente socio local tambe,” segun Ronella Croes, Chief Executive Officer (CEO) di Aruba Tourism Authority (ATA).
E tabata un mainta fructifero segun Croes, cu hopi energia y entusiasmo, na unda a papia riba oportunidadnan y tambe retonan. Durante e conferencia, a trata topiconan cu ta bay tocante Aruba su strategia di comunicacion internacionalmente, ilustrando con Aruba ta bende un servicio y sentimento, un experiencia di ta na Aruba. “Esaki ta algo cu bo no por toca necesariamente.”
Croes ta comenta cu nan a mustra con ATA ta yega na tuma cierto decisionnan, di con ta comunica esaki den diferente mercado, y tambe por medio di ilustra ehempelnan. “Hopi biaha hende no ta para keto riba con e proceso ta wordo encamina, pa yega na e conclusion di con pa ilustra un sentimento, y te cu bo por yega na toca e interes of lanta interes den un persona pa e biaha bin Aruba.”
ATA a ilustra con esaki ta diferencia por ehempel den Nort-America y Latino-America, manera tambe Europa.
Lesa un relato mas amplio den TREMPAN.
