Tres homber a kibra y drenta den Athlete’s Foot den Caya Grandi. Ta alrededor di 10:45 pm ora cu a bati alarma pa tres homber saliendo na careda for di e dicho establecimento. Nan a kibra e porta dilanti, bul’un plywood y logra horta tas y keds y mas acesorio di e negoshi. Tur tres a core bay direccion di hotel central. Na yegada di e prome patruya na hotel central, no a topa cu e dicho personanan.
E buskeda no a para, mesora a pidi refuerso p’asina cubri Playa completo cu polis. Na tres diferente sitio a logra topa cu personanan conoci pa polis. Tur tabata nervio, papia bruha y nan declaracion no a convence e defensornan di ley, cu ta nan mes t’esunnan envolvi den e caso di hortamento. Poco pariba di Corte a topa cu un, djey band’i Island Finance riba John G Emanstraat a topa c’un otro y e di tres net parib’i Kowloon Restaurant.
Esun band’i Kowloon, a hay’e cu un keds marca Nike “nobis nobis.” No mucho leu di unda e topa e di tres sospechoso, a haya varios tas den plastic ainda scondi bou di un auto. Polis ta convenci cu tur tres sospechoso ta envolvi den e caso di robo aki.
A transporta nan den un solo transporte policial pa ward’i polis, caminda nan tin di bay duna cuenta n’un subfiscal di nan acto. Tin cu subraya cu a nota un bon cooperacion entre e polisnan, den un fraccion di 8 pa 9 minuut practicamente a logra resolve e caso aki.
