Diamars atardi a tuma luga varios entrada hudicial, prome na Ranchostraat y despues tambe na cas di un di e sospechosonan na Sero Patrishi. Na Rancho den e cas conoci pa husticia a detene dos homber y un hende muhe. A confisca droga y dos brommer tipo sportbike y un auto marca BMW color preto.
Presente tabatey hues-comisario, fiscal y team di polis di droga. Nan a haya refuerso di team di Mobiele Eenheid y tambe unidad di K9.
A cera e area rond di e cas banda di Rancho pa ningun hende pasa. CEA a presenta cu nan transporte special pa hiba un di e sospechosonan. E otronan a bay den e transporte policial. Ora cu tur cos a caba e personal di CEA a hiba un sospechoso Ward’i Polis di Shaba. E otro dosnan a bay otro warda.
Ora a caba na Ranchostraat a bay na un cas den Sero Patrishi. Ey e sospechoso principal ta biba. Na dicho adres a topa cu droga tambe y arma di candela cu bala cayente. E mesun recherchenan di droga a haci un entrada hudicial na e cas di Sero Patrishi y cu presencia di fiscal y tambe hues-comisario.
Pa algun tempo caba tin wowo riba e hendenan aki cu ta enrikese nan mes cu placa di droga. Bon trabou di tur esnan cu a planea pa haci e razzia exitoso diamars den Rancho y Sero Patrishi caminda a haya droga y arma di candela cu bala cayente.
