Diabierna 8 di december, tin un exposicion di arte na Cas di Cultura titula ‘Portals’ presenta pa tres artista local cu a bini hunto pa e expo aki, y ta bisa cu ta haci falta mas di e tipo di union aki den arte na Aruba. Ta trata aki di e artistanan Rudyo Leysner, Cream of Wu y Liz.
E tres artistanan a cuminsa papia cu otro tocante haci un colaboracion, despues e combersacion a cuminsa bira serio, concepto a cuminsa haya mas forsa. Papiando hunto, a dicidi pa haci algo den serio. E tema di Portals tin como meta pa transmiti un otro tipo di paisahe y dimension unda e trabaonan ta hiba bo ful un otro caminda, dus un portal pa hiba bo un otro caminda.
“Mi estilo ta hopi surreal, mi ta haci hopi portraits, mi ta conoci manera e artista cu ta haci e pinturanan cu wowonan grandi y ful lip,” Liz a conta. E artistanan conoce otro pa algun aña caba y nan tur ta fanatico di e trabou di otro, nan ta admira otro su trabao. “Pocopoco ora nos a keda mira e pinturanan y discuti nos a realisa con nan ta mix cu otro y por haci algo hunto, cual eigenlijk ta haci falta di esey na Aruba, colaboracion, artistanan trahando hunto pa haci algo asina ki,” segun Rudyo Leysner.
Diabierna lo tin e inauguracion na Cas di Cultura pa 7’or di anochi, pueblo completo ta invita, entrada ta totalmente gratis. E exposicion lo keda pa ful luna di december pa tur hende por bin disfruta di e piesanan di arte, funda pa medio di e artistanan mes.
