E compania local y di doñonan netamente Arubiano, esta ABC Tours, un biaha mas tin e honor di anuncia cu nan a wordo selecciona door di ‘Traveler’s Choice Award 2023’ di TripAdvisor den cuater categoria pa loke ta e ‘Best of the Best Top Experiences’ rond mundo y den Caribe. Esaki pa di tres biaha caba.
Nan ta otorga e premio ‘Travelers’ Choice Best of the Best’ na e experencianan y atraccionnan cu un volumen halto di ‘reviews’ y opinionnan di e usuarionan cu ta surpasa e promedio premira durante un periodo di 12 luna. Cada ganado a supera e standardnan riguroso di confianza y siguridad.
Menos di 1% di 8 miyon di esunnan menciona den e lista di TripAdvisor ta gana e premio ‘Best of the Best’, locual ta significa e nivel di mas halto den excelencia den biahenan.
Pa e motibo aki, ABC Tours ta hopi orguyoso di por duna di conoce cu nan a wordo selecciona den e siguiente categorianan:
1. Top Overall Experiences – World. Akinan a resulta cu Aruba a luci un biaha mas door di a scoge ABC Tours den e ranking mundial den e posicion #19.
2, Island Ultimate Jeep Safari in Aruba. ABC Tours a resulta # 2 den Caribe cu su ‘unique tour off-road 4WD’ na e atraccionnan principal di e isla.
3. Family – Friendly Experiences – World: Esaki ta demostra un biaha mas con ABC Tours ta bolbe resalta den loke ta experiencianan pa famia y amigonan den e posicion #4 cu su ‘Aruba Natural Pool and Indian Cave Safari’.
4. Bucket List Experiences – World. A otorga e posicion #5, demostrando cu ABC Tours por ofrece actividadnan unico cu ta bira recuerdonan inolvidabel pa resto di bida.
Den un mundo actual caminda cu cada ‘review’ di turista cu bishita Aruba por laga un impacto grandi atras, e resultadonan aki ta demostra cu Aruba ta sigui ofrece un producto excepcional di calidad halto riba mercado internacional.
Mester menciona cu e prome premionan cu ABC Tours a ricibi di TripAdvisor tabata na 2019. For di e momento ey, Gerencia di ABC Tours a cuminsa pone mas enfasis pa mehora servicio, calidad, trece medida di siguridad mas preciso, mas atencion pa naturalesa y medio ambiente, combina cu un ‘wow factor’ cu ta diferencia nan for di otro tournan similar rond mundo.
Loke a cuminsa como un negoshi local di 3 persona na aña 1995, awe ta un ehempel bibo di con nos Arubianonan por triunfa na nivel mundial y ta haci un aporte grandi na Aruba como producto turistico.
Cu mas di 25 aña di experiencia, ABC Tours & Attractions ta demostra cu e inversion y desaroyo continuo den transcurso di añanan combina cu e esfuerso di e ekipo completo ta duna su fruto y ta trece hopi mas logro pa celebra.
