Awe un grupo di miembronan di Migracion a yega te na oficina di gobierno pa haci entrega di un carta cu nan puntonan di malcontento.
Minister Andin Bikker, encarga cu Departamento di Inmigracion, a ricibi e carta unda cu e vocero a expresa cu tur otro departamento ta yega pasa riba nan, tuma nan autoridad over manera cu a sosode recientemente cu yegada di un vuelo humanitario y DIMAS a tuma over. “Nos ta cansa. Nos tambe ta laga famia na cas pa bin traha y no merece e trato cu nos ta ricibi,” e vocero a indica.
E carta ta contene firma di casi tur e empleadonan mustrando cu nan ta masha rabia y frustra cu sra. Pope, kende ta esun cu ta hiba e maneho diario. Tin hopi cos ta sosode cu sra. Pope no ta duna oido nan. “Nos no kier sra Pope mas. E no sa kico ta come y bebe di un departamento di Migracion.”
A splica cu un departamento yena di hende frustra y rabia no por traha bon, a bini dilanti. Tin haci cambio, sin ningun dia informa nan di loke ta pasando. Ta parce cu e departamento t’ey pa tur hende bin sinta riba nan. “Nos kier pa scucha nos dolornan. Sinta cu nos maske ta un rato,” tabata e peticion haci. A bisa cu ta wantando e personal pa no bay den accion y perhudica turismo, y ta spera di por haya oido.
Tambe tabatin preocupacion cu nan no ta tende di e promocionnan cu ta pega no di awo pero pa hopi aña.
E mandatario na final a bisa di ta lamenta cu a yega bini eynan sin cu a yam’e otro biaha pa inform’e di kico ta pasando y uza accion como ultimo accion. E mandatario a dicidi di duna nan un reunion pero te cu atardi 4.30 pa e por haya chens di repasa y mira kico tur ta para den e carta y loke ta preocupacion di e empleadonan.