Un caos total a tuma luga den ora di merdia ora cu un chauffeur a tuma decision, riba Watty Vos Boulevard, di hala di golpi debi na un taira plat. Aunke el a haci tur esfuerso pa no causa un accidente, esaki no a logra.
Den careda di 11:15 am a pidi presencia di polis pa asina cuminsa dirigi e trafico, como tambe atende cu e hendenan herida. E accidente a tuma luga banda di rotonde Cumana direccion rotonde paperclip.
![](https://24ora.com/wp-content/uploads/2023/11/20231127_114812-1920x1081.jpg)
E chauffeur a bay hala na su man drechi pero un chauffeur di un Audi preto no a tuma nota di locual tabata intencion di e otro auto, pickup berde y el a bin dal den un velocidad basta halto den e pickup. Debi na e impacto un otro auto, Toyota blanco, tambe a haya daño material.
Den total tabatin dos hende herida cu tabatin mester di asistencia di ambulance cu a yega un rato despues na e sitio.
![](https://24ora.com/wp-content/uploads/2023/11/20231127_114030-1920x1081.jpg)
![](https://24ora.com/wp-content/uploads/2023/11/20231127_113945-1920x1081.jpg)
A pidi mas patruya policial pa asina duna un man na dicho rotonde, como cu a bira un caos total den trafico. Mester a desvia trafico na diferente salida pa asina alivia e trafico cu tabata formalmente pega.
![](https://24ora.com/wp-content/uploads/2023/11/20231127_113939-1920x1081.jpg)
![](https://24ora.com/wp-content/uploads/2023/11/20231127_114135-1920x1081.jpg)
![](https://24ora.com/wp-content/uploads/2023/11/20231127_114309-1920x1081.jpg)