Trabaonan a cuminsa na e misa Fatima di Dakota. Pader Daniel Szpila a conta di e proceso, con e trabaonan ta andando y tambe con satisfecho e sacerdote ta cu e proceso, etc.
El a indica cu e proceso mes a cuminsa for di un luna pasa, cu kitamento di e dak bieu, e dak di asbest, cu tabata un trabao hopi delicado y a tuma bastante tempo, pa prevencion di salud di e bisiñanan, di trahadonan. El a tuma casi un luna largo y awor aki no tin dak, no tin plafond. E misa ta habri. Si ta trata di e dak. Awor aki ya por bisa cu por mira algun avance den trabao. Esaki ta duna un poco mas alegria cu trabao ta avanzando. Ta bin awo e cambio di palonan di dak. Hopi palo ta putri caba. Ta casi 60 aña cu e misa tin sin un bon renobacion. Awo e ponemento di dak y plafond ta tumando luga. Full e sistema di coriente tambe ta wordo cambia. A bin trahamento di cashi di coriente y tur esaki ta tuma su tempo. Pero sin duda e proximo simannan lo mira e avanze di e trabao. Ta reuni tambe cu compania cu ta trahando, cu ta Albo. Pader Szpila ta sinti cu e encargo cu nan tin, nan ta haci’e hopi serio, hopi profesional. Nan ta un compania profesional. E mes a keda admira di con nan ta organisa esaki. A haya tambe un schedule di nan trabao, cu ta mustra precisamente ki fecha, ki parti di trabao lo ser realisa na misa.
Ta contento cu por fin por mira e avanze di e renobacion. Tambe hopi contento cu pueblo cu ta participa den e sirbishi religioso di parokia. Aunke e misa ta cera, e santo sacrificio ta tuma luga na cas parokial y bao di tent, rond di e cas parokial. Ta hopi dificil pa haya luga pa parkeer auto. Apesar di tur esaki, pueblo no a aleha. Pueblo ta soportando tur e molester aki cu hopi curashi, cu hasta entusiasmo. Realmente den fin di siman, diasabra, diadomingo, tur e misanan ta bon asisti, maske circunstancianan no ta nada facil, pasobra hasta e calor ta molestia.
Esaki tambe yena Pader Szpila cu hopi alegria y ta admira con pueblo a keda uni cu apesar di tur e dificultad y molester, hende no a plama, no a bandona e parokia, sino ta asisti, ta formando keto bay e mesun famia.
